Bir fılmge $450 myń: Astanada AI baıqaýynyń jeńimpazy belgili boldy
ASTANA. KAZINFORM — Qazaqstanda alǵash ret Astana AI Film Festival kınofestıvali ótti. Baıqaýǵa álemniń 125 elinen 8 067 ótinim túsip, ol jasandy ıntellekt kómegimen jasalǵan fılmder arasyndaǵy eń iri halyqaralyq baıqaýlardyń birine aınaldy.
Astanada festıval jeńimpazdary anyqtaldy.
Gran-prı men 450 myń dollardy (shamamen 201,5 mln teńge) Latvııadan kelgen Nıkolaı Shestak (Nikolay Shestak) «The First Honest Day» fılmi úshin jeńip aldy.
Qazaqstandyq Myrzahan Jumahan «Úzdik keıipker» nomınatsııasynda jeńimpaz atandy. Onyń «It Was Just a Joke» komedııasynda ıt pen ıesiniń aǵasy ázilge bola sózge kelip qalady. Oqıǵa ári qaraı naǵyz blokbaster jelisine ulasady. Avtordyń aıtýynsha, ol ázil-qaljyń men kóńildi oqıǵalardy unatatyndyqtan, osyndaı fılm túsirgen.
Ekinshi oryndy úndistandyq «SITARA» fılmi ıelenip, avtorlaryna 200 myń dollar (shamamen 44,8 mln teńge) berildi. Úshinshi oryn men 100 myń dollar ıspanııalyq «Looking For Perseida» fılmine buıyrdy.
Myńdaǵan ótinimniń ishinen fınalǵa nebári 25 jumys ótti. Olardy ıÝNESKO-nyń burynǵy bas dırektory Odrı Azýle men ınvestor Baladjı Srınıvasandy qosa alǵanda, halyqaralyq qazylar alqasy baǵalady.
Festıvaldiń jalpy júlde qory 2 mln dollardy (shamamen 895,5 mln teńge) qurady. Onyń jartysy júldege, qalǵan bóligi bolashaǵy zor AI-komandalardy qoldaýǵa jáne Qazaqstanda kıno óndirisin damytýǵa baǵyttaldy.
Jasandy ıntellekt kómegimen jasalǵan fılmder endi úlken ekrannan kórsetilip, avtorlaryna júzdegen myń dollar kóleminde júlde berilip jatyr. Astana alǵash ret osyndaı festıvaldi qabyldap, álemniń túkpir-túkpirinen jınalǵan jumystardyń úzdikteri anyqtalǵan alańǵa aınaldy.
Buǵan deıin Memleket basshysy Astana AI Film Festival halyqaralyq kınofestıvalin ashqan bolatyn.
