8 myńnan asa belsendi, 50 uıym: Astanada volonterlik qyzmet qarqyndy damyp keledi
ASTANA. KAZINFORM – Elordada volonterlik qozǵalys jyl sanap qarqyndy damyp keledi. Bul týraly «Astana jastary» jastar resýrstyq ortalyǵynyń volonterlik qozǵalysty damytý bóliminiń mamany Aızat Alı aıtty, dep habarlaıdy elorda ákimdiginiń resmı saıty.
Onyń sózinshe, búginde Astanada 50-ge jýyq volonterlik uıym turaqty negizde jumys isteıdi.
– Jyl saıyn volonterlik qyzmet týraly aqparattyń artýyna baılanysty erikti bolýǵa nıetti azamattardyń sany da kóbeıip keledi. Ásirese balalar men jasóspirimder arasynda volonterlikke qyzyǵýshylyq joǵary. Olardyń biri ózgelerge kómektesýdi maqsat etse, endi biri sheteldik joǵary oqý oryndaryna túsý úshin portfolıosyn jaqsartýdy kózdeıdi, - dedi ol.
Aızat Alıdiń sózinshe, volonterlik uıymdardyń jumysyn úılestirý maqsatynda 2019 jyly Qalalyq volonterler shtaby qurylǵan.
– Qalalyq volonterler shtaby alty jyldan beri «Astana jastary» ortalyǵynyń bazasynda jumys istep keledi. Búginde shtab 30 volonterlik uıymmen, 20 bastamashyl toppen jáne 4 úkimettik emes uıymmen turaqty túrde yntymaqtastyq ornatqan. Qazirgi tańda shtab quramynda 8 myńnan astam belsendi volonter bar, - dep atap ótti maman.
Volonterlik uıymdarmen birlesken jumystar aıasynda túrli áleýmettik jáne ekologııalyq baǵyttaǵy jobalar júzege asyrylyp keledi.
– «BizBirgemiz, «Qaýipsiz qala», «Qamqorlyq mekenjaılary», «Ardagerlerdi ardaqtaıyq», Taza Alem, Taza Qazaqstan, Stop Vandal, «Marafon dobryh del», «Esirtkisiz elorda» aktsııalary aıasynda barlyǵy 1310 is-shara ótkizildi. Bul sharalar barysynda azyq-túlik sebetteri taratylyp, kıim-keshek pen jıhaz jetkizildi, adamdardy izdeý jáne oqytý baǵytynda kómek kórsetildi, - dedi Aızat Alı.
Sonymen qatar qysqy kezeńde qalanyń kásiporyndarymen birlesip, jalǵyzbasty zeınetkerler men qarttardyń aýlalaryn qardan tazalaý jumystary júrgizilgen.
Maman volonterlerdiń jas ereksheligine de toqtaldy.
– Astana jastary» volonterlik qozǵalysyndaǵy eriktilerdiń ortasha jasy – 15-16 jas. Al Qalalyq volonterler shtabyndaǵy volonterlerdiń ortasha jasy – 30. Bul – kómek kórsetýge sanaly túrde kelgen azamattar, - dedi ol.
Aızat Alıdiń aıtýynsha, volonterler atqarǵan eńbegi úshin aqy almaıdy, alaıda olardy yntalandyrý mańyzdy.
– Qazirgi tańda volonterlerge mádenı is-sharalar men kontsertterge bıletter berý arqyly qoldaý kórsetip kelemiz. Volonterlik qyzmetti eńbek ótili retinde esepteý máselesi birneshe ret kóterilgenimen, áli zań júzinde bekitilgen joq, - dedi ol.
2025 jyly elordalyq volonterler respýblıkalyq jáne halyqaralyq deńgeıdegi iri is-sharalarǵa belsendi qatysqan.
– «Astana jastary» volonterleri 130-dan astam iri is-sharaǵa qatysty. Sonyń ishinde Djennıfer Lopes pen Backstreet Boys kontsertteri bar. Bul sharalarǵa qazaq, orys jáne aǵylshyn tilderin meńgergen 140 volonter tartyldy, sondaı-aq qytaı, túrik, koreı, ıtalıan jáne nemis tilderin biletin eriktiler de boldy, - dedi maman.
Ekologııalyq baǵytta da aýqymdy jumystar atqarylǵan.
– «Taza Alem jobasy aıasynda 55 ekosenbilik ótkizildi. Onyń ishinde Esil ózeniniń jaǵalaýyn tazartý boıynsha 25 is-shara uıymdastyryldy. 20 úkimettik emes uıymnyń qatysýymen 10 myńnan astam volonter men 4 myń qala turǵyny tartyldy, - dedi Aızat Alı.
Sondaı-aq eriktiler 800 aǵash otyrǵyzýǵa atsalysyp, onyń eki sharasy Memleket basshysynyń qatysýymen ótkenin atap ótti.
– «Qamqorlyq mekenjaılary» jobasy aıasynda 70 jalǵyzbasty zeınetkerge kómek kórsetilip, qar tazalaý boıynsha 40 aktsııa uıymdastyryldy. Bul jumystarǵa 3 myńnan astam volonter men kásiporyn qyzmetkerleri tartyldy. Sonymen qatar Qurban aıt merekesinde 1000 azyq-túlik jıyntyǵy jetkizildi, - dep qorytyndylady ol.
Eske salsaq, Qazaqstannyń usynysymen Birikken Ulttar Uıymy 2026 jyldy eriktiler jyly dep jarııalady. Halyqaralyq eriktiler qozǵalysy tileýlestik, meıirimdilik syndy myzǵymas adamgershilik qundylyqtaryn pash etedi.