8 myńnan asa adam aldandy: «Amanat Drive» qarjy pıramıdasy áshkere boldy

ASTANA. KAZINFORM — QMA Almaty oblysy boıynsha departamenti «Amanat Drive» ataýymen qarjy pıramıdasynyń qyzmetin áshkereledi.

Qarjy pıramıdanyń uıymdastyrýshylary azamattarǵa paıyzsyz bólip tóleý arqyly jyljymaıtyn múlik pen avtokólik satyp alýdy usynǵan. Alaıda bul mindettemeler tolyq oryndalmaǵan, al múlik týystary men jaqyndaryna berilgen. Nátıjesinde qarjy pıramıdasy 8 myńnan astam salymshyny tartqan, olardyń jalpy salǵan qarajaty 21 mlrd teńgeden asqan. Qylmystyq jolmen alynǵan kiristerdi zańdastyrý maqsatynda, qarjy pıramıdanyń uıymdastyrýshysy birneshe deńgeıli zańsyz shema jasaǵan. Ol óz baqylaýyndaǵy zańdy tulǵalardy — «Allo, ne kerek», «i-m@rketing», «Gold SapaPremium» JShS — paıdalanǵan.

Atalǵan kompanııalar jalǵan jetkizýshiler retinde kórsetilip, jarnama qyzmetteri, jyljymaıtyn múlik pen kólik naryǵyna taldaý men boljaý júrgizý sekildi qyzmetterdi oryndaǵan bolyp kóringen. Osy jalǵan sharttar negizinde 1,8 mlrd teńgeden astam qarajat qolma-qol aqshaǵa aınaldyrylyp, syrtqa shyǵarylǵan.

Qylmystyq kirister esebinen jeke turǵyn úıler, astanada páterler, sondaı-aq HUMMER H2 jáne Lexus LX570 markaly qymbat avtokólikter satyp alynǵan. Bul múlikter múmkin bolatyn tárkileýden jasyryný maqsatynda senimdi adamdardyń atyna rásimdelgen.

— Sot sanktsııasymen atalǵan múlikke jáne tutyný kooperatıviniń shottaryna tyıym salyndy. Qarjy pıramıdanyń bas uıymdastyrýshysy qamaýǵa alyndy. Tergeý amaldary jalǵasyp jatyr. QR Qylmystyq is júrgizý kodeksiniń 201-babyna sáıkes ózge aqparat jarııa etilmeıdi, — delingen vedomstvo habarlamasynda.

Budan buryn Shyǵys Qazaqstanda 6 qarjy pıramıdasy halyqqa 400 mln teńgeden astam zalal keltirgenin jazǵanbyz.