8 myńnan 85 myńǵa deıin: Qazaqstan qalalarynda til kýrsy qansha
ASTANA. KAZINFORM – Qazaqstan qalalaryndaǵy til kýrstarynyń baǵasynda on ese aıyrmashylyq bar. Kýrs baǵasy aıyna 8 myńnan bastalyp, 85 myńǵa deıin jetti. Baǵaǵa óńir, oqý ádisi men tańdaý baǵdarlamasy, til ortalyǵynyń ózi de áser etedi, dep habarlaıdy Kazinform tilshisi.
Til kýrstaryndaǵy baǵany salystyrǵan kezde eresekterge arnalǵan aǵylshyn tili baǵdarlamasyna toqtaldyq. Sebebi qazirgi kezde dál osy kýrsqa suranys artyp tur.
Eń joǵary baǵa Astana men Almaty qalalarynda tirkeldi. Elordada til kýrsynyń baǵasy 40 000 – 85 000 teńge aralyǵynda. Al Almaty qalasynda 28 000 teńgeden bastalyp, 78 000 teńgege jetti. Baǵa joǵary qalalar qatarynda Shymkent te bar. Munda til kýrsynyń quny aıyna 60 000 teńgege deıin barady.
Oblys ortalyqtarynyń kóbinde baǵa 20 000 – 45 000 teńge aralyǵynda. Al Qaraǵandy men Jezqazǵan qalalarynda oqý aqysy 20 000 – 60 000 teńge, Semeıde 25 000 – 58 300 teńge aralyǵynda bolsa, Taldyqorǵan, Taraz ben Qonaevta 45 000 teńgege deıin jetti.
Baǵa Qostanaı men Atyraý qalalarynda aıyna 15 000 – 25 000 teńge, Qyzylordada 15 000 – 40 000 teńge, Pavlodarda 25 000 – 33 000 teńge, Petropavlda 22 500 – 30 000 teńge, Kókshetaýda 30 000 – 35 000 teńge, Óskemende 17 900 – 30 200 teńge aralyǵynda.
Aǵylshyn tili kýrsynyń eń arzany Oral qalasynda. Munda aıyna 8 000 teńgeden bastalady. Aqtaý qalasynda 18 000 – 50 000 teńge aralyǵynda bolsa, Aqtóbede 20 000 teńgeden bastalyp tur. Bul baǵa shamamen alynǵan jáne birinde oqý toppen bolsa, endi birinde jeke úıretedi. Til kýrstarynyń kóbi oqý aqysyn aı saıyn alady. Oqý aptasyna eki nemese úsh ret ótedi jáne uzaqtyǵy 60 mınýttan 90 mınýtqa deıin sozylady. Alaıda kýrstyń uzaqtyǵy men oqý ádisi baǵdarlama men til ortalyǵyna tikeleı baılanysty bolady.
Sonymen birge keıbir til ortalyqtary halyqaralyq emtıhandarǵa, sonyń ishinde IELTS synaǵyna bólek daıyndaıdy. Suranysqa baılanysty arnaıy kýrstar usynady. Onyń baǵasy bólek esepteledi.
Qazaqstannyń iri qalalarynda aǵylshyn tilinen basqa qytaı, fransýz, nemis, túrik, káris jáne ózge de shet tilderiniń kýrstary bar. Biraq barlyq qalada birdeı tańdaý bola bermeıdi jáne onyń baǵasy aǵylshyn tilin oqytý kýrsyna qaraǵanda ózgeshe esepteledi.
Aıta keteıik, balalardyń oqý kýrsy baǵasy bul taldaýǵa kirmedi. Til kýrsynyń baǵasy balanyń jasyna, oqý baǵdarlamasynyń uzaqtyǵy men toptyń deńgeıine baılanysty ózgerip otyrady.
Buǵan deıin eldegi bedeldi JOO-larda oqý aqysy týraly jazyldy.
