8 memleket Izraıldi Tramptyń Gaza jónindegi josparyn oryndamaǵany úshin aıyptady
ASTANA. KAZINFORM – Túrkııa, Mysyr, Indonezııa, Iordanııa, Pákistan, Katar, Saýd Arabııasy jáne BAÁ syrtqy ister mınıstrleri Izraıldiń AQSh prezıdenti Donald Tramptyń BUU Qaýipsizdik Keńesiniń №2803 qararymen maquldanǵan Gaza sektory boıynsha josparyn oryndaýdan bas tartýyn aıyptady. Bul týraly Anadolý jazdy.
Mınıstrler birlesken málimdemede Izraıldiń bul ustanymy jospardyń júzege asýyna jáne ádil ári uzaq merzimdi beıbitshilik ornatýǵa baǵyttalǵan kúsh-jigerge qaýip tóndiretinin atap ótti.
Olardyń pikirinshe, jospardan bas tartý Gaza sektorynda jáne basqa da okkýpatsııalanǵan Palestına aýmaqtarynda beıbitshilik ornatýǵa baǵyttalǵan áreketterge kedergi keltirgeni úshin jaýapkershilikti Izraılge júkteıdi.
Syrtqy ister mınıstrleri Gaza sektoryndaǵy soǵysty toqtatý, gýmanıtarlyq jaǵdaıdy jaqsartý jáne anklavty qalpyna keltirý jumystaryn bastaý úshin jospardy dereý ári tolyq júzege asyrý qajettigin atap ótti.
Dıplomattar ádil ári turaqty beıbitshilikke tek 1967 jylǵy shekaralar negizinde eki memleket qurý arqyly qol jetkizýge bolatynyn málimdedi. Bul rette astanasy Shyǵys Ierýsalım bolatyn táýelsiz Palestına memleketin qurý qajettigi aıtyldy.
Mınıstrler AQSh-ty jospardyń oryndalýyn qamtamasyz etýge belsendi atsalysýdy jalǵastyrýǵa shaqyrdy. Sondaı-aq Beıbitshilik keńesin jospardy júzege asyrýǵa kedergi keltiretin máselelerdi joıý úshin «shuǵyl ári naqty sharalar» qabyldaýǵa úndedi.
Aıta keteıik, buǵan deıin Qatardyń Batys jaǵalaýdaǵy ızraıldik qonystanýshylardyń palestınalyqtarǵa shabýylyn aıyptaǵanyn jazdyq.
