8 qazan. Týǵan kún ıeleri
ASTANA. QazAqparat - Búgin, ıaǵnı 8 qazan kúni tulǵalardan kimder dúnıege kelgen? QazAqparat oqyrmandaryna esimder kúntizbesin usynady.
ESІMDER
78 jyl buryn (1940) aktrısa, Qazaqstannyń halyq ártisi, Kókshetaý qalasynyń qurmetti azamaty Jibek Esekeıqyzy BAǴYSOVA dúnıege keldi.
Aqmola oblysynda týǵan. Abaı atyndaǵy Qazaq memlekettik akademııalyq opera jáne balet teatry janyndaǵy ánshilik-hor stýdııasyn bitirgen. 1960-1995 jyldary Qyzylorda oblystyq drama teatrynda, 1995 jyldan Sh.Qusaıynov atyndaǵy Aqmola oblystyq mýzykalyq drama teatrynda óner kórsetedi. Ol oınaǵan Qaragóz, Qarlyǵa, Júztaılaq (M.Áýezovtiń «Qaragózinde», «Qara qypshaq Qoblandyda», «Túngi sarynda»), Aqtoty (Ǵ.Músirepovtiń «Aqan seri - Aqtotysynda»), Eva Broer (Q.Muhamedjanovtyń «jat eldesinde»), Ajar (S.Júnisovtiń «Ajar men ajalynda»), Qamajaı (D.Isabekovtiń «Ápkesinde»), Álıman men Tolǵanaı («Sh.Aıtmatovtyń povesi boıynsha qoıylǵan «Ana - Jer anasynda»), Shapaq (M.Kárimniń «Aı tutylǵan túninde»), Tata Neradova (A.P.Shteınniń «Tolasynda»), Regana (Ý.Shekspırdiń «Korol Lırinde»), t.b. rólder aktrısa talantyn tanytty. Ol jasaǵan sahnalyq beınelerdiń ulttyq boıaýy aıqyn. Sonymen qatar sahnada keıipkerdiń ishki tolǵanystaryn, psıhologııalyq kóńil-kúılerin tereń ashýymen erekshelenedi.
Qazaqstan Respýblıkasynyń Prezıdenti N.Nazarbaevtyń Alǵys hatymen, «Parasat» ordenimen marapattalǵan.
56 jyl buryn (1962) qazaqstandyq saıası qaıratker - Erlan Saparuly BAIJANOV dúnıege keldi.
Almaty qalasynda týǵan. M.V. Lomonosov atyndaǵy Máskeý memlekettik ýnıversıtetin (1985), osy oqý ordasynyń aspırantýrasyn (1988) támamdaǵan. Fılologııa ǵylymynyń kandıdaty. Jýrnalıst.
1989-1990 jyldary - S.M.Kırov atyndaǵy Qazaq memlekettik ýnıversıtetiniń aǵa oqytýshysy. 1990-1991 jyldary - «Sovety Kazahstana» gazeti redaktsııasynyń parlamenttik sholýshysy, bólim meńgerýshisi. 1991-1996 jyldary - kásipkerlik salasynda jumys istedi. 1996 jyldyń sáýirinen - SІM baspasóz qyzmetiniń birinshi hatshysy, SІM aqparat jáne baspasóz bóliminiń meńgerýshisi. 1997 jyldyń qańtarynan - QR Prezıdenti Baspasóz qyzmetiniń sektor meńgerýshisi, QR Prezıdenti Baspasóz qyzmeti jetekshisiniń orynbasary. 2004 jyldyń naýryzynan - Qazaqstan Respýblıkasynyń Reseıdegi Elshiliginde keńesshi-ýákil, Ujymdyq qaýipsizdik jónindegi Shart uıymynda ókiletti ókil. 2005 jyldyń tamyzynan - QR Mádenıet, aqparat jáne sport birinshi vıtse-mınıstri. 2006 jyldyń aqpanynan - QR Prezıdentiniń Ákimshiligi Aqparattyq-taldaý ortalyǵynyń meńgerýshisi. 2007 jyldyń aqpanynda Qazaqstan Respýblıkasy Prezıdentiniń Baspasóz hatshysy bolyp taǵaıyndaldy. 2008-2010 jyldary - «Arna medıa» ulttyq aqparattyq holdınginiń basqarma tóraǵasy. 2009-211 jyldary - «Samuryq-Qazyna» AQ-nyń basqarýshy dırektory. 2011-2014 jyldary «Nur Medıa» holdınginiń bas dırektory boldy.
«QR táýelsizdigine 10 jyl», «Astanaǵa 10 jyl» mereıtoılyq medaldarymen, QR Prezıdentiniń Alǵyshatymen marapattalǵan.
