8 kásipqoı mýaıtaıshy «Astana qalasy ákiminiń kýbogy» úshin shaıqasady
ASTANA. QazAqparat - Elordanyń 20 jyldyǵyna oraı 15 maýsymda Astanada mýaıtaıdan kásipqoılar arasyndaǵy «Astana qalasy ákiminiń kýbogy» halyqaralyq týrnıri ótedi, dep habarlaıdy Astana ákimdiginiń resmı saıty.
Halyqaralyq shara QR Mýaıtaı federatsııasy jáne Astana qalasy ákimdiginiń uıymdastyrýymen ótetin bolady.
Týrnır 71 kg deıingi salmaqta «segizdik» formatynda ótkiziledi. Onda Taıland, AQSh, Brazılııa, Shvetsııa, Polsha, Iran jáne Qazaqstan sııaqty elderdiń segiz kásipqoı sportshysy shaıqasatyn bolady.
Dúnıejúzilik mýaıtaı keńesiniń (WMC) nusqasy boıynsha 51 kg salmaqta kásipqoılar arasyndaǵy Azııa chempıony belbeýi úshin halyqaralyq dárejedegi sport sheberi Elaman Saıasatov pen Taıland Koroldiginiń chempıony Kongkamraı Jırapongtyń kezdesýi keshtiń negizgi urysy bolmaq.
Aıqastardyń ótetin orny: EHRO-2017 aýmaǵyndaǵy «Kongress-ortalyq».
Jarystar saǵat 18:00-de bastalady dep josparlanǵan. Kirý tegin.
