8 gramm marıhýana úshin qostanaılyqqa mıllıon teńge aıyppul salyndy
QOSTANAI. QazAqparat - Qazaqstan-Reseı shekarasynan kontrabandalyq jolmen marıhýana alyp ótpek bolǵan Qostanaı oblysynyń turǵynyna 1 mıllıon teńgeden astam aıyppul salyndy.
Qostanaı oblystyq soty baspasóz qyzmetiniń habarlaýynsha, Qarabalyq aýdandyq sotynyń úkimimen 27 jastaǵy azamat 7,96 gr marıhýanany zańsyz alyp, tyıym salynǵan zatpen shekaradan ótýde aıypty dep tanyldy. Er adamdy QR memlekettik shekarasynda «Qaıraq» shekaralyq baqylaý jasaǵy ustady. Sot qylmyskerge 1 mıllıon teńgeden astam aıyppul salý túrinde jaza taǵaıyndady.
