8 balany jetim qaldyrǵan qaraqshylardyń jazalanýyn «Nur Otan» fraktsııasy aıryqsha nazarda ustaıdy -Tileýhan
ASTANA. QazAqparat - 8 balany jetim qaldyrǵan qaraqshylardyń ádil jaza alýyn Májilistegi «Nur Otan» fraktsııasy aıryqsha nazarda ustaıdy.
Búgin QR Parlamenti Májilisiniń jalpy otyrysynan keıin elimizdiń Іshki ister mınıstrine depýtattyq saýal joldaǵan májilismen Bekbolat Tileýhan osylaı aıtty.
«Ótken aptada Almaty oblysynyń Jambyl aýdanynda bolǵan jantúrshigerlik oqıǵa, qanquıly qylmys búkil eldiń qabyrǵasyn qaıystyryp otyr. Adal eńbegimen bala-shaǵasyn asyrap júrgen esil azamattar Doldanuly Jarqynbek, Zarlyhanuly Muqııat, Álimhan Qadylbektiń aıdyń-kúnniń amanynda qaraqshylardyń qolynan aıýandyqpen qaza tabýy janymyzdy jabyrqatyp otyr. Keshe ǵana jer qoınyna tapsyrylǵan osy qyrshyndardyń, marqumdardyń otbasylarynyń qaıǵylaryna ortaqtasyp kóńil aıtamyz. 8 balany jetim qaldyryp kóz jasyna qalǵan qaraqshylardyń ádil jaza alýyn Parlament Májilisindegi «Nur Otan» aıryqsha nazarynda ustaıtyndyǵyna sendirgimiz keledi, jubatqymyz keledi», - dedi B. Tileýhan.
Sonymen qatar ol bul bir otbasynyń ǵana emes búkil qoǵamnyń júregine túsip otyrǵan aýyr salmaq ekendigin basa aıtty.
«Qoǵamnyń dertin tazartýǵa ekpin berýge biz mindettimiz. Ata kásibi mal sharýashylyǵy bolǵan elde mal urlyǵyna ústirt qaraý, polıtsııa tarabynan qajetti nazardyń kemshin bolýy da jasyryn emes. Jalpy, sońǵy kezde qarap otyrsaq, beıbit eldiń berekesin alǵan ekstremızm men terrorızm, nárestesin kúresinge laqtyrǵan ana, ana deýge kelse eger, adamdyqtan bezgen pedofılııa syndy qylmystar qoǵamda órship bara jatyr. Jalpy, munyń emi óte aýqymdy sharalarǵa muqtaj ekendigi túsinikti ǵoı. Biraq, ázirshe, osy oraıda Іshki ister mınıstrligine tómendegideı saýaldar joldaımyn. Mınıstrlik osy ispettes qylmystardy aldyn alý jáne boldyrmaý maqsatynda qandaı jumystar atqarmaq? Ásirese, qazirgi kezde jergilikti polıtsııa qyzmeti qurylǵannan keıin. Ekinshiden, osyndaı qoǵamnyń alańdatýshylyǵyn týdyrǵan qylmystardy erekshe kategorııadaǵy qylmystar dep baǵalap, olarǵa beriletin jazany barynsha kúsheıtý úshin qandaı shara qoldanylmaq?», - dedi depýtat.
