8 aıda temirjol arqyly 9,3 mln tonna astyq tasymaldandy - Astyq shtabynyń otyrysy
ASTANA. KAZINFORM- 2026 jylǵy qańtar–tamyz aılarynda Qazaqstanda temirjol kóligimen 9,3 mln tonna astyq tasymaldandy. Bul ótken jyldyń sáıkes kezeńimen salystyrǵanda 13%-ǵa kóp. Eksporttyq tasymaldar 14%-ǵa ósip, 7,2 mln tonnany, respýblıkaishilik tasymaldar 8%-ǵa ósip, 2,1 mln tonnany qurady.
Tamyz aıynda aılyq tasymal kóleminiń rekordtyq kórsetkishi tirkelip, 1,2 mln tonnaǵa jetti. Bul 2025 jylǵy tamyz aıyndaǵy kórsetkishten 35%-ǵa joǵary.
Osy máseleler Atbasar qalasynda ótken Qazaqstan Respýblıkasy Kólik mınıstrliginiń Astyq shtabynyń otyrysynda talqylandy.
Otyrysqa Temirjol jáne sý kóligi komıtetiniń tóraǵasy Nurjan Kelbuǵanov tóraǵalyq etti. Jıynǵa júk jóneltýshiler, treıderler men eksporttaýshylar, «QTJ» UK» AQ, «Astyq Trans» AQ, ákimdikterdiń ókilderi, sondaı-aq Aýyl sharýashylyǵy mınıstrliginiń fıtosanıtarııalyq qyzmetteri qatysty.
Qatysýshylar astyq tıeý kólemin, eksporttyq baǵyttardy, vagondardyń qoljetimdiligin jáne jańa egin astyqtaryn tasymaldaýdy uıymdastyrý máselelerin talqylady.
Astyq maýsymy bastalǵaly beri oblystan 80-ge jýyq marshrýttyq poıyz jóneltildi. Marshrýttyq tasymaldar tehnıkalyq stantsııalarda qaıta óńdeýsiz mejeli stantsııaǵa deıin tikeleı júrý arqyly astyqty jetkizý ýaqytyn qysqartýǵa múmkindik beredi. Bul vagondardyń keıingi tıeý jumystaryna jyldamyraq bosatylýyna yqpal etedi.
Negizgi eksporttyq baǵyt Ózbekstan bolyp qala beredi. Bul elge 606,4 myń tonna astyq jóneltildi, bul oblystan shyǵarylǵan astyq eksportynyń 43%-yn quraıdy.
Reseıge – 170 myń tonna, Aýǵanstanǵa – 135,6 myń tonna, Tájikstanǵa – 133,5 myń tonna, Qytaıǵa – 84,1 myń tonna astyq jóneltildi. Sonymen qatar Ázerbaıjanǵa, Qyrǵyzstanǵa, Belarýske, Latvııaǵa, Estonııaǵa jáne Túrikmenstanǵa da astyq jetkizildi.
Temirjol salasy jańa ónimdi tasymaldaýǵa daıyn. Tasymaldaýdy qamtamasyz etý úshin shamamen 16 myń astyq tasyǵysh vagon, 17,8 myńnan astam jabyq vagon jáne 2 myń lokomotıv jumyldyryldy.
Jyl basynan beri lokomotıv parki 169 lokomotıvpen tolyqty.
Eksporttyq tasymaldardy qamtamasyz etý maqsatynda jekelegen baǵyttarda tómendetilgen tarıftik sharttar qoldanylady. Atap aıtqanda, Ózbekstan aýmaǵyndaǵy Keles – Ǵalaba ýchaskesinde tasymaldaý kólemine qaraı 30%-dan 50%-ǵa deıin jeńildik beriledi.
Keles – Hodjadavlet jáne Qaraqalpaqstan – Ǵalaba ýchaskelerinde tıisinshe 60% jáne 40% jeńildikter qoldanylady.
Otyrys barysynda fıtosanıtarııalyq baqylaýdan ótý, tasymaldaýdy uıymdastyrý jáne eksporttyq baǵyttar boıynsha astyqty ýaqtyly jóneltýdi qamtamasyz etý máseleleri de qaraldy.
Otyrys qorytyndysy boıynsha problemalyq máseleler aıqyndalyp, olardy jedel sheshý úshin jaýapty taraptarǵa tıisti tapsyrmalar berildi.
Osyǵan deıin Qazaqstanda temirjolmen astyq tasymaldaý kóleminiń artqany týraly jazdyq.
