8 aıda ósimdikter karantınine qatysty 2,7 myńnan astam zań buzýshylyq anyqtaldy - AShM

NUR-SULTAN. QazAqparat - Bıylǵy jyldyń 8 aıynda Qazaqstanǵa ákelinetin júkterdi tekserý kezinde ósimdikter karantıni salasynda 2,7 myńnan astam zań buzýshylyq anyqtaldy, dep habarlaıdy QazAqparat QR Aýyl sharýashylyǵy mınıstrliginiń baspasóz qyzmetine silteme jasap.

Bapasóz qyzmetiniń málimetterine qaraǵanda, kóp jaǵdaıda ósimdik ónimderin ımporttaýshylar taýarlardy mindetti fıtosanıtarııalyq sertıfıkattarsyz alyp kelýge tyrysady. Sondaı-aq, osyǵan deıin jalǵan nemese sáıkes kelmeıtin sertıfıkatpen, tyıym salynǵan jáne zııankesteri bar ónimderdi elge kirgizý áreketteriniń kóptegen joly qıyldy.

Atalǵan faktiler boıynsha 2225 jeke jáne zańdy tulǵaǵa 110 879 243 teńge aıyppul salyndy. 720 jaǵdaıda júk qaıta jóneltýshi elge qaıtaryldy (9992 tonna, 1259 m3 jáne 1 701 273 dana), 8 jaǵdaıda ónim joıyldy, úsh jaǵdaıda qaıta óńdeldi.

Anyqtalǵan zań buzýshylyqtarǵa baılanysty eksporttaýshy elderge 477 notıfıkatsııa jiberildi, onyń ishinde 252 – Ózbekstan Respýblıkasyna, 127 – Reseı Federatsııasyna, 38 – Iran Islam Respýblıkasyna.

Qazirgi ýaqytta Qazaqstanda 77 syrtqy jáne ishki fıtosanıtarııalyq baqylaý beketteri jumys isteıdi. Onyń ishinde 32 beket respýblıkanyń shekara mańyndaǵy óńirlerinde karantındik fıtosanıtarııalyq baqylaýdy kúsheıtý úshin sońǵy jyly ǵana ashylǵan.

«Memlekettik karantındik fıtosanıtarııalyq baqylaý elge qaýipti karantındik obektilerdiń - ósimdikterdi zaqymdaıtyn ósimdik aýrýlarynyń qozdyrǵyshtaryn, jándikterdiń, kenelerdiń, nematodtardyń, sondaı-aq aramshóp tuqymdarynyń memleket shekarasynan ótip ketpeýi úshin júzege asyrylady»-delingen habarlamada.