8 aıda negizgi kapıtalǵa 11,5 trln teńge ınvestıtsııa tartylǵan

ASTANA. KAZINFORM — 8 aıdyń ishinde elde zaýyttar salyp, jol men turǵyn úı turǵyzýǵa, óndiris oryndaryn jabdyqtaýǵa 11,5 trln teńge ınvestıtsııa tartylyp, negizgi kapıtalǵa jyl basyndaǵy kórsetkishten 14,3% artqan. Bul týraly Ulttyq ekonomıka vıtse-mınıstri Arman Qasenov ortalyq kommýnıkatsııalar qyzmetinde ótken baspasóz máslıhatynda málim etti. 

— 8 aıda negizgi kapıtalǵa salynǵan ınvestıtsııa kólemi 14,3% ósip, 11,5 trln teńgege jetti. 2024 jyldyń 8 aıyndaǵy kórsetkishpen salystyrǵanda ınvestıtsııa ósimi qarjy jáne saqtandyrý qyzmetinde 204,1%, bilim salasynda 192,8%, óńdeýshi ónerkásipte 134,3%, aýyl sharýashylyǵynda 129,1%, kólik salasynda 115,1%, jyljymaıtyn múlik salasynda 111,4% tirkeldi, — dedi vıtse-mınıstr.

Onyń sózinshe jalpy táýelsizdik jyldarynda elge tartylǵan tikeleı sheteldik ınvestıtsııalardyń jalpy kólemi 465 mlrd dollarǵa jekten.

— 2025 jyldyń birinshi toqsanynda tikeleı sheteldik ınvestıtsııalar kólemi 6,6 mlrd dollar boldy. Bul 2024 jyldyń 8 aıymen salystyrǵanda 6,2% kóp, — dedi Arman Qasenov.

Eske salsaq, el ekonomıkasynyń basym sektorlarynda jańa ınvestıtsııalyq jobalar bekitilgen bolatyn.