8 aıda kóshi-qon zańnamasyn buzýdyń 180 myń faktisi anyqtaldy - QR ІІM
ASTANA. QazAqparat - 2016 jyldyń qańtar-tamyzynda kóshi-qon zańnamasyn buzýdyń 180 myń faktisi anyqtaldy. Bul týraly búgin Parlament Májilisinde «Qazaqstan Respýblıkasynyń keıbir zańnamalyq aktilerine ekstremızmge jáne terrorızmge qarsy is-qımyl máseleleri boıynsha ózgerister men tolyqtyrýlar engizý týraly» zań jobasy boıynsha jumys tobynyń otyrysynda QR Іshki ister vıtse-mınıstri Rashıd Jaqypov málim etti.
R. Jaqypovtyń sózine qaraǵanda, Іshki ister mınıstrligi azamattardyń tirkeýge turýy baǵytynda tıisti sharalardy júrgizýdi josparlap otyr. Sonymen bir mezgilde, tirkeýsiz turýǵa qatysty merzimdi bir aıǵa deıin qysqartý kózdelýde.
«Biz barlyq turǵyndardy tekserýdi qarastyryp otyrǵanymyz joq, alaıda zańnama talaptary oryndalmaǵan jaǵdaıda, onda zań buzýshylar jaýapkershilikke tartylady», - dedi ol.
Onyń atap ótýinshe, vedomstvo usynyp otyrǵan sharalar baspana ıeleriniń jeke adamdarǵa páterlerin tirkeýsiz usynǵany úshin jaýapkershilik júkteıdi. Páter ıeleri men basqa da tulǵalardyń tirkeýsiz azamattardy turǵyzýǵa qatysty jaýapkershiligi artady.
Zań jobasy boıynsha jumys barysynda depýtattar tarapynan túrli mándegi 120 túzetý engizildi, sonyń ishinde jeke tulǵalardy tirkeý erejesin buzǵany úshin jaýapkershilikke qatysty baǵyty da qamtylǵan.
