8 aıda 112 myńǵa jýyq adam jumyspen qamtyldy - Dúısenova

ASTANA. QazAqparat - Aǵymdaǵy jyldyń 8 aıynda 112 myńǵa jýyq adam jumyspen qamtyldy. Bul týraly búgin QR Úkimeti otyrysynda elimizdiń densaýlyq saqtaý jáne áleýmettik damý mınıstri Tamara Dúısenova málim etti.

«Ústimizdegi jyldyń 8 aıynda jumyspen qamtý baǵdarlamasynyń aıasynda 112 myńǵa jýyq azamatty jumyspen qamtydyq. Olardyń 66,5 paıyzy  - jumyssyzdar, 22,4 paıyzy  - ózin-ózi jumyspen qamtyǵan azamattar. Jalpy baǵdarlamaǵa qatysýshylardyń ishinen 81 myń azamat búgingi tańda turaqty jumys ornyna ornalastyrylyp, jumys berýshiler tarabynan áleýmettik jarnalar tólene bastady», - dedi ol.

Mınıstrdiń aıtýynsha, bul kórsetkishter ótken jyldarmen salystyrǵanda edáýir joǵary bolyp otyr.

«Árıne, bıylǵy jylǵa bólingen qarajat somasyna bul tikeleı baılanysty. Eger jyl basynda belgilengen soma 37,8 mlrd. teńge bolsa, Baqytjan Ábdiruly, ózińiz atap ótkendeı, Elbasynyń eńbek naryǵyndaǵy turaqtylyqty saqtaý maqsatynda jáne egemendigimizdiń 25 jyldyǵyna oraı árbir eldi abattandyrý tapsyrmasyn oryndaý úshin qosymsha  90,6 mlrd. bólindi. Sonymen baǵdarlamaǵa 128,4 mlrd. teńge bólinip, onń aıasynda 14 myńnan astam jobalar júzege asyrylýda», - dedi T.Dúısenova.