8 aı buryn joǵalǵan mańǵystaýlyqty tabýǵa kómekteskenderge 2 mln teńge berilmek
AQTAÝ. KAZINFORM — 34 jastaǵy Erlan Esmaǵambetov jumystan shyqqannan keıin, úıine oralmaǵan. Ol 17 naýryz kúni Kendirli demalys aımaǵy mańyndaǵy jumys ornynan beıtanys adamnyń kóligine otyrǵan. Sodan úıine kelmegen.
— Jumystasy úlkendeý adam. Ol «Erlannyń ishi aýyrdy, sosyn men qoryqqannan jolǵa shyǵyp, jolshybaı mashınaǵa mingizip jiberdim» dep otyr. Ol kólik júrgizýshimen bizdi polıtsııa kezdestirdi. Ol rastady. Biraq, jolaýshy 10-15 mınýttan keıin ózi túsip qaldy dep otyr. Balam uıaly telefonyn jumysynda qaldyryp ketken, — deıdi anasy Gúlmıra Esmaǵambetova.
3 aı ótkennen keıin Erlannyń kúrteshesi daladan tabylǵan. Týystary ony bireýler quldyqta ustap otyr ma dep kúdiktenedi.
Osy oqıǵa boıynsha oblystyq polıtsııa deparatamenti qylmystyq is qozǵalǵanyn, sonyń aıasynda qajetti sharalar júrgizilip jatqanyn habarlady.
— Adam joǵalý deregi boıynsha Qaraqııa aýdandyq polıtsııasyna týystarynan aryz túsken sátten bastap qylmystyq is qozǵaldy. Tergep-tekserý amaldary júrgizildi. Jedel izdestirý sharalary áli kúnge deıin jalǵasyp jatyr. Erlan Esmaǵambetov izdestirý esebine qoıylyp, búkil el boıynsha polıtsııa bólimderine baǵyttama joldanyp, aqparat berildi, — delingen habarlamada.
Aıta keteıik, Erlan Esmaǵambetov otbasyly, 3 balasy bar. Týystary ony taýyp bergen adamǵa 2 mıllıon teńge syıaqy beriletinin jetkizdi.
Buǵan deıin, Pavlodar oblysynda joǵalǵan ańshynyń biriniń máıiti tabylǵan bolatyn.