Kólikterdi bıýdjetke tólenýi tıis bajdan bosatqan burynǵy keden qyzmetkeri Ispanııadan ekstradıtsııalandy

ASTANA. KAZINFORM – Laýazymdyq ókilettikterdi teris paıdalaný jáne qyzmettik jalǵandyq jasaýda kúdikke ilingen tulǵa Ispanııadan ekstradıtsııalandy, dep habarlaıdy QR Bas prokýratýrasynyń baspasóz qyzmeti.

Baspasóz qyzmetiniń málimetterine qaraǵanda, kúdikti azamatty Qazaqstan Respýblıkasynyń Bas prokýratýrasy men Ulttyq qaýipsizdik komıtetiniń Sybaılas jemqorlyqqa qarsy is-qımyl qyzmetiniń qyzmetkerleri Qazaqstannyń Ispanııa Koroldigindegi Elshiliginiń qoldaýymen Barselona qalasynan ekstradıtsııalady.

Ol 2020 jyly keden organdarynyń qyzmetkeri bola otyryp, aqparattyq derekqorǵa jalǵan málimetter engizý arqyly 8 avtokóliktiń ıelerin bıýdjetke tólenýge tıis kedendik bajdardan zańsyz bosatqan dep kúdik keltirilip otyr.

Keltirilgen zalaldyń jalpy somasy 45 mıllıon teńgeden asady. Kúdikti úsh jyldan astam ýaqyt boıy qylmystyq qýdalaý organdarynan boı tasalap, halyqaralyq izdeýde bolǵan, keıin QR ІІM-niń Interpol suraý salýy boıynsha Ispanııa aýmaǵynda ustaldy.

Qazirgi ýaqytta kúdikti Astana qalasynyń tergeý ızolıatoryna qamaldy. Ózine taǵylǵan qylmystardy jasaǵany úshin múlki tárkilenip, belgili bir laýazymdardy atqarý nemese belgili bir qyzmetpen aınalysý quqyǵynan ómir boıyna aıyra otyryp, jeti jylǵa deıingi merzimge bas bostandyǵynan aıyrý jazasy kózdelgen.

Osyǵan deıin Qarjy pıramıdasyn basqarǵany úshin izdeýde júrgen adam Grýzııadan ekstradıtsııalanǵany týraly jazdyq.