8 áleýmettik mańyzy bar azyq-túlik ónimi arzandady
ASTANA. KAZINFORM – Ulttyq statıstıka bıýrosynyń málimetinshe 1-8 sáýir aralyǵynda áleýmettik mańyzy bar azyq-túlik taýarlarynyń baǵa ındeksi 0,2% boldy.
— Apta ishinde áleýmettik mańyzy bar taýarlar toby boıynsha baǵanyń negizgi ósýi maýsymdyq kókónisterge qatysty boldy. Atap aıtqanda, qyryqqabat — 6,8%, sábiz ben pııaz — 2,7%, kartop — 1,6% qymbattaǵan. Sondaı-aq, qant — 0,7%, kúnbaǵys maıy men sıyr eti — 0,2%, taýyq eti — 0,1% óskeni tirkeldi. Al áleýmettik ónimniń 8 túri boıynsha baǵa arzandady: sút — 0,5%, un men aıran — 0,4%, kúrish, qaraqumyq jáne jumyrtqa — 0,3%, sary maı men makaron — 0,2%, — delingen habarlamada.
Kókónister baǵasynyń qazirgi ósýi maýsymdyq sıpatqa ıe, óıtkeni dál osy kezeńde kókónisterge degen baǵanyń ósýi dástúrli túrde baıqalady. Mundaı aýytqýlar ýaqytsha. Baǵanyń turaqtylyǵyn saqtaý jáne ishki naryqty qoljetimdi kókónistermen qamtamasyz etý úshin «QTJ Ekspress» AQ-nyń uıymdastyrýymen Qytaı men Pákistannan shamamen 15 myń tonna kartop ákelindi. Sondaı-aq, Ózbekstan Respýblıkasynan qyryqqabat jetkizilip jatyr — jyl basynan beri 3 000 tonna qyryqqabat ımporttaldy. Qabyldanǵan sharalar áleýmettik mańyzy bar kókónistermen naryqty tolyq qamtamasyz etýge múmkindik beredi.
20 sáýirde Túrkistan oblysynan erte shyqqan qyryqqabattyń ishki naryqqa shyǵady. Odan keıin basqa da kókónis túrleriniń alǵashqy ónimderi Túrkistan oblysynan jáne kórshiles ońtústik elderden jetkiziledi. Bul óńir dástúrli túrde elimizdiń naryǵyn alǵashqy jańa ónimmen qamtamasyz etedi.
Saýda komıteti áleýmettik mańyzy bar azyq-túlik taýarlaryna belgilengen saýda ústemesi mólsheriniń saqtalýyn baqylaý jumystaryn jalǵastyryp jatyr.
— 2025 jyldyń I toqsanynda aýmaqtyq departamentter saýda zańnamasyn buzýǵa baılanysty 1 332 ákimshilik qaýly shyǵardy. Onyń ishinde 183 jaǵdaıda 11,1 mln teńgeden astam somaǵa aıyppul salynsa, 1 149 jaǵdaıda eskertý berildi. Sonyń ishinde áleýmettik mańyzy bar azyq-túlikke 15%-dan joǵary ústeme qosqany úshin 1 207 qaýly shyǵarylyp, onyń 74-ine 6 mln teńgeden astam somaǵa aıyppul salyndy, al qalǵan 1 133 jaǵdaıǵa eskertý berildi. 2024 jyldyń osy kezeńinde 582 quqyqbuzýshylyq tirkelip, onyń 136-na (6,1 mln teńgeden astam) aıyppul, al 446-na eskertý berilgen. 204-4-bap boıynsha 497 qaýly shyǵarylyp, onyń ishinde 51 jaǵdaıda 3,8 mln teńgeden astam aıyppul salynǵan, — delingen habarlamada.
Osylaısha, 2025 jyly áleýmettik mańyzy bar azyq-túlikke saýda ústemesin artyq qosý faktileri ótken jylmen salystyrǵanda 2,4 esege artty.