79 jastaǵy qart ustaz latyn álipbıin úıretip júr - Qostanaı oblysy
QOSTANAI. QazAqparat - Qostanaı oblysy Áýlıekól aýdanyna qarasty Moskalev aýylynyń 79 jastaǵy turǵyny Kókenakı Ábdildın zamandastaryna latyn álipbıin úıretip júr, dep habarlaıdy QazAqparat tilshisi.
Kókenakı Ábdildın - «Qazaqstannyń bilim berý isiniń úzdigi» ataǵyn alǵashqy bolyp alǵan pedagogtardyń biri. Búginde zeınetke shyqqan qarııa ustazdyq mindetin toqtatqan emes. Ol óz zamandastaryna latyn álipbıin úıretýdi qolǵa aldy. Dáris sabaqtaryn ótken jyldyń 8 jeltoqsany kúni bastaǵan.
«Men bul jumysym úshin kók tıyn da almaımyn. Ómir boıy ustazdyq etip kele jatqan soń, qoǵamǵa bir paıdam tısin degen oımen bastadym. Aldymen, aýdandyq gazetke «Qosh keldiń, latyn álipbıi!» degen maqalamdy latyn qarpimen jarııaladym. Sodan soń latyn álipbıin úırengisi kelgender habarlasyp, sabaq berýimdi surady. Osylaısha, Elbasynyń «Rýhanı jańǵyrý» baǵdarlamalyq maqalasynda kórsetilgen basym baǵytty naqty ispen kórsetýdi qolǵa aldym», - deıdi ardager ustaz.
Kókenakı aqsaqaldyń shákirtteriniń kóbi - óz zamandastary. Áýeli, sabaq aýyldyq meshitte ótken. Keıin, «oqýshy» sany artqan soń, jergilikti mektep dırektory arnaıy kabınet bólgen.
«Jarmaǵambet Qusaıynov, Beısen Jurqabaev, Dúısen Jaryqbaev, Oraz Qalmaǵambetov sııaqty aýyl aqsaqaldary birde-bir sabaqtan qalǵan emes. Sonyń arqasynda, olar qazir latyn álipbıimen jaza biledi. Qazir dáristerge 12 adam turaqty kelip turady. Aptasyna bir ret jınalamyz», - dedi Kókenakı Ábdildın.
Sabaqqa alǵashqyda zeınetkerler, aýyl jumysshylary ǵana qatyssa, qazir muǵalimder men oqýshylar da kelip júr. Sebebi, qyryq jylǵa taıaý qazaq tilinen sabaq bergen qart ustazdyń tájirıbesi jas býynǵa úlgi.
Kókenakı Ábdildın qajetti kórnekilikterdi óz qolymen jasaıdy. Munyń syrtynda, ol latyn álipbıindegi daýyssyz, daýysty dybystardyń jiktelýin qurastyrǵan.
Aıtpaqshy, qart pedagog sabaqtyń birinshi toqsanyn 6 aqpan kúni qorytyndylady. Onyń aıtýynsha, úzdik «shákirtteri» keleshekte qarip ózgergende qatardan qalyp qoıamyz dep qoryqpaıdy.
