79,4 myńǵa jýyq adam jumysynan aıyrylýyna baılanysty áleýmettik tólem aldy
Bıyl 78,2 myń azamatqa tólem alǵash ret taǵaıyndaldy, dep habarlaıdy QazAqparat QR Eńbek jáne halyqty áleýmettik qorǵaý mınıstrliginiń baspasóz qyzmetine silteme jasap.
Qoldanystaǵy zańnamaǵa sáıkes jumystan bosatylǵan qyzmetkerler mindetti áleýmettik saqtandyrý júıesine qatysý ótiline jáne sońǵy 24 aıdaǵy tabysyna baılanysty 1 aıdan 6 aıǵa deıin jumysynan aıyrylýy boıynsha áleýmettik tólemder alady. Tólem qyzmetker joǵaltqan tabystyń 40% - na deıingi mólsherde MÁSQ qarajaty esebinen júzege asyrylady.
Jumystan bosatylǵan qyzmetkerge tólem taǵaıyndaý úshin:
- eGov.kz portalynda tirkelý;
- «Jumysqa ornalastyrý jáne jumyspen qamtý» bóliminde «Jumys izdep júrgen adamdardy tirkeý» qyzmetin tańdaý;
- onlaın qyzmetke tapsyrys berip, barlyq joldardy toltyrý jáne ETsQ-men qol qoıý arqyly ótinimdi jiberý qajet;
- bir kún ishinde ótinish berýshiniń turǵylyqty jeri boıynsha jumyspen qamtý ortalyǵy (budan ári – HJQO) bos jumys oryndaryn usynady;
- eger jumys tabylmasa, 3 kún ishinde qashyqtan jumyssyz mártebesi beriledi (qajet bolǵan jaǵdaıda qosymsha aqparat jınaý úshin ótinish berýshimen HJQO qyzmetkeri habarlasady).
Bul qyzmetti onlaın rejımde Elektrondyq eńbek bırjasy (enbek.kz) arqyly da alýǵa bolady.
Azamat jumyssyz retinde tirkelgen soń Eńbek jáne halyqty áleýmettik qorǵaý mınıstrliginiń aqparattyq júıesi proaktıvti formatta MÁSQ-tan tólem taǵaıyndaý boıynsha qyzmet kórsetýge kelisim berý úshin uıaly telefonǵa SMS-habarlama jiberedi. Kelisken jaǵdaıda SMS-habarlamaǵa jaýap berý qajet. Tólem avtomatty túrde taǵaıyndalady.
Esterińizge sala keteıik, MÁSQ qarajaty esebinen jumysynan aıyrylǵan jaǵdaıda tólenetin áleýmettik tólem jumystan bosatylý sebepterine qaramastan júzege asyrylady jáne jumyssyz adam jumys izdep júrgen kezeńde ony qoldaýǵa arnalǵan.
Memleket basshysynyń osy jylǵy 1 qyrkúıektegi Qazaqstan halqyna Joldaýynda aıtylǵan tapsyrmasyn oryndaý úshin 2023 jylǵy 1 qańtardan bastap MÁSQ-ten jumysynan aıyrylǵan jaǵdaıda tólenetin áleýmettik tólem mólsheri orta eseppen 13% - ǵa ulǵaıtylady. Áleýmettik saqtandyrý júıesin damytýdyń osy jáne basqa da sharalary QR Áleýmettik kodeksiniń jobasynda kózdelgen.
Budan buryn habarlanǵandaı, QR Eńbek jáne halyqty áleýmettik qorǵaý mınıstrligi Elektrondyq eńbek bırjasy arqyly halyqty jumyspen qamtý ortalyqtarynyń qashyqtan qyzmet kórsetý fýnktsıonalyn iske qosty.
Bul jumyssyzdardy tirkeý jáne jumyspen qamtýdy qoldaý boıynsha memlekettik qyzmetterdi, onyń ishinde jumysynan aıyrylý boıynsha áleýmettik tólemderdi alý rásimderin jeńildetýge múmkindik berdi. Endi barlyǵyn tek ınternet, kompıýter jáne elektrondyq tsıfrlyq qoltańbanyń kómegimen jasaýǵa bolady.
