78 jastaǵy kentaýlyq qarııa shpagatqa otyryp, edenge baspen turady
Túrkistan oblysynyń turǵyny – 78 jastaǵy Jeńis Berikqara shpagatqa otyryp, biltemirge tartylady, dep habarlaıdy Kazinform.
Kentaýlyq qarııany jerlesteri «Salaýatker» dep ataıdy. Sebebi, aqsaqal árdaıym salaýatty ómir saltyn nasıhattap júredi. Sportqa qumar. Tańsáride turyp jattyǵýlar jasaıdy. Beltemirge tartylyp, gir tasyn kóteredi. Tipti shpagatka otyryp, edenge baspen turady. Jasy 80-ge jaqyndap qalǵan qarııa úshin bul jattyǵýlar túk qıyndyq týdyrmaıdy.
«Eki kózim kórmeı qaldy. Sondyqtan burynǵydaı babymda emespin. Jas kúnimde keýdeme tas qoıyp, balǵamen urǵyzyp syndyrtatynmyn. Qazir oǵan shamam kelmeıdi. Qartaıdym. Biraq jattyǵýlardy úzbeımin. Tańerteń jáne keshkisin aýlada sportpen shyǵyldanamyn. Balamdy ertip, qala kóshelerinde jaıaý júrip kelemin. Muzdaı sýǵa túsemin. Baspen turyp, aıaqtarymdy shynyqtyramyn. Munyń bári densaýlyqqa óte paıdaly», – deıdi ol.
Jeńis Berikqara budan bólek, qarapaıym qurylys materıaldarynan túrli kompozıtsııalar jasaýmen shuǵyldanady. Máselen, Qazaqstan EQYU-ǵa tóraǵalyq etken jyly tasty qashap, eskertkish balbaltas jasasa, Uly Jeńistiń 65 jyldyǵy qarsańynda maıdangerlerdiń erligin beıneleıtin kompozıtsııa jasaǵan. Al zymyran maketiniń ishinen gúl ósirgen kompozıtsııasy beıbitshiliktiń belgisin kórsetedi.
«Bos ýaqytymda gúl ósirýmen aınalystym. Olardyń arasynda roza gúlden bastap, sırek kezdesetin túrleri de boldy. Qartaıǵan soń, qaraýǵa shamam kelmedi. Sodan úı gúlderin tanystaryma taratyp berdim. Al esik aldyndaǵy gúlder áli de bar. Kóktem shyǵyp, kún jylynysymen jaıqalyp ósedi. Qoldan jasaǵan buıymdarymdy qaladaǵy mádenıet saraıyna tabystadym», – deıdi aqsaqal.
Belsendi qarııa úıiniń janyndaǵy shaǵyn ǵana bólmeni mýzeıge aınaldyryp qoıǵan. Onda qol dıirmen, kúmis quman sekildi 1 myńǵa jýyq eksponat bar. Odan bólek, ózi jazǵan «Amanat», «Salaýatker», «Qassaq» atty úsh kitaby men jınaqqa engen áńgimeleri men óleńderin ornalastyrǵan. Tórde dombyra ilýli tur. Fotosýretter men ózge de zattar sórelerden oryn alǵan. Al erterekte qoldanylǵan patıfon áli kúnge deıin istep tur.
