78 PIK nelikten qaıta tirkeýden óte almady – mınıstrlik túsindirdi
ASTANA. KAZINFORM – 78 páter ıeleri kooperatıvi men páter ıeleriniń tutyný kooperatıvteri qaıta tirkeýden óte almady. Bul týraly Quryltaı depýtattarynyń saýalyna Ónerkásip jáne qurylys vıtse-mınıstri Rahymjan Isaqulovtyń jaýabynda aıtylǵan.
- Ádilet mınıstrligi 2026 jylǵy 12 shildege deıin ótinish bergen páter ıeleri kooperatıvterin (budan ári – PIK) jáne páter ıeleriniń tutyný kooperatıvterin (budan ári – PITK) qaıta tirkeý nátıjeleri týraly aqparat usyndy. Búginge deıin 395 PIK jáne 132 PITK qaıta tirkeýden ótti. Zańdy tulǵalardy tirkeý salasyndaǵy Qazaqstan Respýblıkasynyń qoldanystaǵy zańnamasyna sáıkes kelmeıtin qujattar usynylýyna baılanysty 78 PIK/PITK-ny qaıta tirkeýden bas tartyldy,- dedi Rahymjan Isaqulov.
Onyń atap ótýinshe, tirkeýden bas tartýdyń negizgi sebepteri mynalar:
- quryltaı qujattarynyń «Turǵyn úı qatynastary týraly» jáne «Zańdy tulǵalardy memlekettik tirkeý jáne fılıaldar men ókildikterdi eseptik tirkeý týraly» Zańdardyń talaptaryna sáıkes kelmeýi;
- qatysýshylardyń quramy jáne kondomınıým obektisin basqarý organynyń ornalasqan jeri týraly málimetterdiń durys bolmaýy;
- qajetti málimetterdiń bolmaýy;
- menshik ıeleri jınalysyn shaqyrý jáne onyń sheshimin resimdeý tártibiniń buzylýy.
- Sonymen qatar, qaıta tirkeýden bas tartý týraly sheshim qabyldanǵan PIK/PITK usynǵan qujattardy qaıta qaraý úshin joǵary turǵan organdardyń tıisti tapsyrmasy nemese múddeli memlekettik organdardyń ótinishi qajet ekenin atap ótemiz. Sebebi qoldanystaǵy tártipte belgilengen rásimderden tys qujattardy qaıta qaraý kózdelmegen, - dedi vıtse-mınıstr.
Buǵan deıin Múlik ıeleri birlestigi tóraǵalarynyń quzyretine qatysty birqatar dál emes ári ekiushty uǵymdar anyqtalǵanyn, burynǵy MIB tóraǵasynyń ETsQ-syna táýeldilikten qalaı arylýǵa bolatynyn jazǵan edik.
