78 myń medıtsına qyzmetkeri eńbekaqysyna ústeme alady

NUR-SULTAN. QazAqparat – Shildeniń qorytyndysy boıynsha 78 myń medıtsına qyzmetkeriniń eńbekaqysyna ústeme beriledi. Bul týraly QR Densaýlyq saqtaý mınıstrliginiń resmı ókili Baǵdat Qojahmetov málim etti, dep habarlaıdy QazAqparat tilshisi.

«Ústemeaqy alatyndardyń tizimin jedel shtab janynda qurylǵan óńirlik komıssııalar qalyptastyrady. Al komıssııa tóraǵalary retinde ákim orynbasarlary qyzmet etýde. Sonymen qatar, onyń quramynda medıtsınalyq saqtandyrý qory fılıaldarynyń qyzmetkerleri, óńirlik bas sanıtar dárigeri, densaýlyq saqtaý basqarmasynyń jáne úkimettik emes uıymdar ókilderi qamtylǵan», - dedi resmı ókil Ortalyq kommýnıkatsııalar qyzmetinde.

Onyń sózine qaraǵanda, atalǵan tizim negizinde medıtsına qyzmetkerlerine tólem jasalady.

«Bul turǵyda qordyń málimetinshe, vırýstyq ınfektsııa jaǵdaıynda jumysqa tartylǵan medıtsına qyzmetkerleriniń sany aı saıyn ósken. Eger naýryzda osy ústemeaqyny 19 adam alsa, maýsym aıynda olardyń sany 53 myńǵa deıin jetti. Al shilde aıynyń qorytyndysy boıynsha óziniń jalaqysyna ústemeaqyny 78 myń qyzmetker alady», - dedi Qojahmetov.