78 adamdy aldaǵan alaıaqqa qatysty qylmystyq is sotqa jiberildi
Almaty qalasy Polıtsııa departamentiniń tergeý basqarmasy birqatar alaıaqtyq jasady degen kúdikke ilingen 29 jastaǵy M.esimdi er adamǵa qatysty qylmystyq isti aıaqtady.
«Sotqa deıingi tergeý barysynda kúdiktiniń OLX.kz saıtynyń qoldanýshylaryna qatysty 78 aldaý faktisine qatysy bar ekendigi anyqtaldy. Fıshıng ádisin qoldana otyryp, OLX.kz saıtyna uqsas senimsiz siltemelerdi jiberip, kúdikti jábirlenýshilerge, egerde berilgen siltemeler boıynsha ózderiniń banktik málimetterin toltyrǵan jaǵdaıda, taýarlar úshin tólem ala alasyndar dep sendirdi. Kúdiktiniń aıtýynsha, taýarlardy kýrerler alyp ketýi kerek bolǵan. Alaıda jábirlenýshilerdiń kartalarynyń derekterin alǵan M.esimdi er adam, «Wooppay.kz» tólem júıesi arqyly olardyń qarajattaryn óziniń banktik kartalaryna aýdarǵan. Jalpy ol azamattarǵa 2,5 mln teńge kóleminde materıaldyq shyǵyn keltirildi», – dedi Almaty qalalyq Polıtsııa departamenti bastyǵynyń orynbasary Rústem Ábdrahmanov.