78 adam qaza tapqan: túrkııalyqtar Grand Kartal qonaqúıindegi tragedııany eske aldy

ASTANA. KAZINFORM – Túrkııada 78 adamnyń ómirin qıǵan órttiń bir jyldyǵyna oraı qaza tapqandardyń týystary men jergilikti turǵyndar qonaqúı mańyna jınalyp, qurbandardy eske aldy, dep habarlaıdy Kazinform menshikti tilshisi.

Qaıǵyly oqıǵaǵa týra bir jyl toldy. Bolý provıntsııasyndaǵy Kartalkaıa taý shańǵysy kýrortynda ornalasqan Grand Kartal qonaqúıi aldynda adamdar túngi saǵat 03:17-de – bir jyl buryn órt shyqqan dál sol sátte jınaldy. Qonaqúı aldyna qaza tapqandardyń sýretteri qoıylyp, sham jaǵylyp, gúl shoqtary qoıyldy.

Marqumdardyń jaqyndary bir jyl ótse de, qaıǵynyń azaımaǵanyn aıtty. Sonymen birge olarǵa órtke qatysty sot isiniń sheshimi úmit syılaǵan.

Qaza tapqandardyń otbasylary Bolý sotynyń úkimin ádil sot tóreligine degen senimdi qalpyna keltirýdiń sırek úlgisi dep baǵalady. Olardyń pikirinshe, bul sheshim jaýapsyzdyq sezimin joıýǵa bolatynyn kórsetti.

Týystarynyń aıtýynsha, olardyń basty ári ózgermeıtin talaby – kinálilerdiń barlyǵy laıyqty jazasyn alýy jáne mundaı tragedııanyń endi eshqashan qaıtalanbaýy.

Buǵan deıin qaza tapqandardyń máıitterin taný tolyq aıaqtalǵany habarlanǵan bolatyn. Taý shańǵysy kýrortyndaǵy órt saldarynan barlyǵy 78 adam, onyń ishinde balalar da kóz jumdy.

Keıin Grand Kartal qonaqúıindegi órtke qatysty is boıynsha sot úkimi shyǵaryldy.