7,7 mln teńge bás tikken: Jetisýda eki sheneýnik qyzmetinen ketti
ASTANA. KAZINFORM — Jetisý oblysynyń Kóksý aýdanynda eki laýazymdy tulǵa qumar oıyndarǵa qatysqany úshin qyzmetinen bosatyldy. Olardyń biri – aýdandyq bólimshe basshysy.
Kóksý aýdandyq prokýratýrasy lýdomanııanyń aldyn alý jáne sybaılas jemqorlyqqa qarsy shekteýlerdiń saqtalýy boıynsha taldaý júrgizip, memlekettik qyzmetshilerdiń býkmekerlik keńseler arqyly qumar oıyndarǵa qatysyp, bás tikkenin anyqtady.
Prokýratýra málimetinshe, atalǵan tulǵalar býkmekerlik keńseniń mobıldi qosymshasy arqyly júıeli túrde bás tikken. Olardyń oıyn shottaryn tolyqtyrýǵa jumsaǵan qarajatynyń jalpy somasy 7,7 mıllıon teńgeden asqan.
— Prokýrorlyq qadaǵalaý aktisiniń qaralýy nátıjesinde tártiptik komıssııa eki laýazymdy tulǵany atqaryp otyrǵan qyzmetterinen bosatý týraly sheshim qabyldady. Olardyń biri memlekettik qyzmette 20 jyldan astam eńbek ótili bar aýdandyq bólimshe basshysy, — delingen habarlamada.
Prokýratýra mundaı áreketter memlekettik qyzmettiń bedeline nuqsan keltirip, qoǵamnyń memlekettik qyzmetshilerge degen senimin tómendetýi múmkin ekenin atap ótti.
Jetisý oblysynyń prokýratýrasy sybaılas jemqorlyqqa qarsy shekteýlerdiń saqtalýyn jáne qumar oıyndarǵa táýeldiliktiń aldyn alýdy baqylaýdy jalǵastyrady.
Buǵan deıin lýdomanııany qalaı anyqtaýǵa bolatynyn jazǵanbyz.
