«760greenkm» eko-marafonyna qatysýshylar Petropavlda boldy
PETROPAVL. QazAqparat – Taldyqorǵannan bastaý alǵan «760greenkm» ekologııalyq marafonyna qatysýshylar Petropavlda boldy. Áýesqoı sportshylar oblys ortalyǵynyń kóshelerimen 42 shaqyrymdy júgirip ótip, aktsııa aıasynda kóshege tal otyrǵyzdy, dep habarlaıdy QazAqparat tilshisi.
Almatylyq kásipkerler, alysqa júgirýden tájirıbesi bar áýesqoı sportshylar Dmıtrıı Kım, Ǵalym Chýashev jáne Aıdyn Sádibekov bul is-sharany bir apta buryn bastaǵan edi. Osy aralyqta olar elimizdiń shyǵysy men ortalyq jáne soltústigine qaraıtyn jeti qalada boldy. Petropavl – eko-marafonshylar kelgen segizinshi qala. Alaıda aktsııaǵa bul joly Dmıtrıı Kım men Ǵalym Chýashev qana qatysty. Aıdyn Sádibekov alǵan jaraqatyna baılanysty júgire almady.
«Bul ıdeıa – meniki. 18 qalany 18 kúnde baǵyndyramyz. Ár qalada klassıkalyq marafon júgiremiz, ıaǵnı 42 shaqyrymdy. Biz jaı ǵana júgirip ótpeı, aktsııa aıasynda tal otyrǵyzamyz dep sheshtik. Osylaısha eń kemi 760 aǵash otyrǵyzý josparymyzda bar. Ár óńirde bizge jergilikti marafonshylar qosylady, jol kórsetedi», - deıdi áýesqoı-sportshy Ǵalym Chýashev.
Jospar boıynsha «760greenkm» eko-marafonyna qatysýshylar 760 shaqyrymdy júgirip ótýleri qajet. Segiz kúnniń ishinde olar Taldyqorǵan, Óskemen, Semeı, Pavlodar, Qaraǵandy, Nur-Sultan jáne Kókshetaý qalalarynda boldy.
«Ár qalada ekologııalyq másele bar. Bizdiń maqsatymyz osyǵan qoǵamnyń nazaryn aýdartý. Biz júgirip ótken keı qalada júgiretin sportshylarǵa jaǵdaı jasalmaǵan. Tipti arba súıregen analarǵa júretin joldar qarastyrylmaǵan», - deıdi Dmıtrıı Kım.
Petropavl kóshelerimen 42 shaqyrymdy júgirip ótken áýesqoı sportshylardyń kelesi baǵyty – elimizdiń batysy. Jalpy «760greenkm» eko-marafony 7 qazan kúni Almatyda aıaqtalmaq.
