76 jastaǵy keıýanany tonaǵan eki áıel ustaldy - SQO
PETROPAVL. QazAqparat – Soltústik Qazaqstan oblysynda eki alaıaq áıel 76 jastaǵy keıýanany aldap, úıinen aqshasy men altyn buıymdaryn alyp ketken, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, Pokrovka eldi mekeniniń 76 jastaǵy turǵyny ózin tonap ketkendigi jaıynda polıtsııaǵa aryzdanǵan. Zeınetkerdiń aıtýynsha, úıine beıtanys áıel kelip, ózin memlekettik qyzmetshimin dep tanystyrǵan, áńgimege tartqan. Ekeýi sóılesip jatqanda aýla syrtyndaǵy esikten úıge ekinshisi kirip, aqsha men altyn buıymdardy urlaǵan. Keltirilgen shyǵynnyń jalpy somasy 580 myń teńgeden asady.
«Urlyq jasady degen kúdikpen sol kúni eki áıel ustaldy. Olar mingen kólikti kórshi Jambyl aýdanynda tártip saqshylary toqtatty. Áıelderdiń bireýi Mamlıýtka qalasynyń 42 jastaǵy turǵyny. Ekinshisi Qostanaı oblysy Uzynkól aýdanynyń 48 jastaǵy turǵyny, buryn sottalǵan eken. Tekserý barysynda olardan urlanǵan altyn buıymdar men aqsha tabylyp, alyndy», - deıdi Mamlıýt aýdandyq polıtsııa bólimi bastyǵynyń mindetin atqarýshy Jeńis Temirbekov.
Atalǵan fakti «Urlyq» baby boıynsha Sotqa deıingi tergep-tekserýlerdiń biryńǵaı tizilimine engizildi. Tergeý júrgizilýde. Qazir kúdiktilerdi qamaýǵa alý máselesi sheshilip jatyr.
