76 jastaǵy qazaqstandyq marafonshy Nıý-Iorkte 42 shaqyrymdy júgirip ótti
NUR-SULTAN. QazAqparat – Saltanat Túıtibaev — kásibı marafonshy. ıAǵnı qazaqstandyq jáne halyqaralyq júgirý marafondaryna turaqty qatysady. 76 jastaǵy sportshy 7 qarasha kúni AQSh-tyń Nı-Iork qalasynda ótken halyqaralyq marafonǵa qatysty. Osy oraıda QazAqparat tilshisi jelaıaq qarııamen kishigirim suhbat qurǵan bolatyn.
Saltanat Túıtibaev 1945 jyly 21 shildede Jambyl oblysy, Moıynqum aýdany, Kókterek aýylynda dúnıege kelgen. Ustazdyq mamandyqty ıgerip, biraz jyldar muǵalim bolǵan. Keıin kásipodaq salasyna aýysyp, al odaq ydyrap qıyn-qystaý zaman bastalǵanda jeke kooperatıv ashyp, tirshilik etken. Búginde ol Nur-Sultan qalasynda turady.
Kúni keshe ǵana marafonshy AQ-tyń Nıý-Iork qalasynda ótken halyqaralyq marafonda kópshilikpen birge 42 shaqyrym 195 metrdi júgirip ótti.
«Aldymen aıtarym, Nıý-Iork marafonynda júgirý árbir marafonshynyń basty armany. Sebebi halyqaralyq marafondardyń ishindegi eń bedeldisi desem bolady. Oǵan álemniń túkpir-túkpirinen shamamen 50-52 myń adam qatysady. Men osydan 2 jyl buryn Amsterdamda júgirý marafonynan biliktilikti rastaıtyn normatıvti tapsyrdym, normatıv nátıjesi belgili bolǵannan keıin Nıý-Iorktegi júgirý marafonyn uıymdastyrýshylar meni qatysýǵa shaqyrdy. Bul marafon negizi byltyr ótýi kerek edi, biraq pandemııaǵa baılanysty keıinge shegerildi. Jalpy atalǵan júgirý saıysy jyl saıyn qarasha aıynyń alǵashqy demalysynda ótedi. Shynymdy aıtaıyn, buǵan deıin men mundaı marafondy kórgen emespin. Osyǵan deıin túrli deńgeıdegi 22 halyqaralyq júgirý marafonyna qatystym», - dedi Saltanat Túıtebaev.
Onyń aıtýynsha, júgirý marafonynyń nátıjesi áli shyqqan joq.
«Marafon jas ereksheligine qaraı topqa bólinip ótti. Meniń jasym 76-da men 75 pen 79 jas aralyǵyndaǵy marafonshylar sanaty boıynsha qatystym. Jalpy júgirý ońaıǵa soqqan joq, óıtkeni bul marafonnyń jóni men talaby basqa. Degenmen qatysqanyma qýanyshtymyn, nátıjesin kóre jatarmyz. Taǵy bir qýantarlyq jaǵdaı, osyndaǵy qazaq baýyrlarymyz meniń qatysatynymdy estip, bilip maǵan úlken qoldaý kórsetti. Ózimizdiń qazaqtyń balalary marafon bitken soń meni kútip alyp, gúl shoǵyn syılap, jyly lebizderin bildirip, qurmet kórsetti», - deıdi ol.
Sondaı-aq, jelaıaq qarııa buǵan deıin de túrli halyqaralyq marafondarǵa qatysqanyn aıtty.
«Osyǵan deıin Avstralııada júgirýden ótken álem birinshiliginde 2-oryn aldym. Sonymen qatar Jańa Zelandııanyń Oklend qalasynda ardagerler arasynda ótken marafonda 1-orynǵa ıe boldym. Kelesi jyly halyqaralyq ardagerler marafonyna taǵy qatysam dep josparlap otyrmyn. Marafon 2022 jyldyń mamyr aıynda Japonııada ótýi tıis, negizi bıyl ótýi kerek edi, oǵan koronavırýsqa baılanys ýaqytyn shegerdi», - dedi jerles atamyz.
