76 jastaǵy almatylyq zeınetker velosıpedpen álemniń 40 elinde bolǵan
NUR-SULTAN. QazAqparat – Almaty qalasynyń turǵyny, 76 jastaǵy zeınetker Túgelbek Qasymov velosıpedpen álemniń 40 elinde bolyp qaıtqan. Álemdi qos dóńgelekti kólikpen sharlaǵan zeınetker velosaıahaty týraly QazAqparat tilshisine aıtyp berdi.
«Men ShQO Tarbaǵataı aýdany Jambyl aýylynyń týmasymyn. Týǵan ólkemde 45 jyl ustaz bolyp, balalarǵa matematıkany úırettim. Sońǵy 10 jyl Almaty qalasynda turyp jatyrmyn. Velosıped tebý basty áýesim, velosıpedpen álemniń 40 elinde boldym. Velosherýdi aldymen óz otanymyzdan bastadym, Qazaqstannyń barlyq óńirinde boldym. Sodan soń Reseıge attandym, kórshi eldiń de biraz aımaǵynda bolyp qaıttym. Elordadan Máskeýge velosıpedpen 14 kúnde jettim. Odan ári Belarýs, Polsha arqyly 12 kúnniń ishinde Berlınge bardym. Odan bólek, taǵy Máskeýge baryp odan ári Ýkraına, Moldavııa, Rýmynııa Bolgarııa arqyly Grekııa astanasy Afınaǵa jettim», - dedi Túgelbek Qasymov.
Sondaı-aq, zeınetker jerlesimiz velosaparmen Parıjde de bolǵan. Jáne ol velosherýge jalǵyz shyǵady.
«Densaýlyq jarap turǵan sátte, velosıpedpen el aralaýdy odan ári jalǵastyrmaqpyn. Búgin el Táýelsizdigimen 30 jyldyǵy men Ybyraı Altynsarınniń 180 jyldyǵyna oraı bir top adam Nur-Sultan qalasynan Qostanaıǵa velosıpedpen attanyp baramyz. Alda Jambyl Jabaevtyń 175 jyldyq mereıtoıy tur, buıyrsa Almatydan Tarazǵa velosıpedpen barý jospary tur. Odan bólek, indettiń jaǵdaıy rettelse 2022 jyly Almatydan Qytaı qalasy Shanhaıǵa deıin velosherý uıymdastyrýdy kózdep otyrmyn. Saparda 6,5 myń shaqyrym júrý kerek», - deıdi ol.
