76 jastaǵy qazaqstandyq saıahatshy 3 myń shaqyrym jol júrip, Parıjge jetti
ASTANA. KAZINFORM – Saıahatshy Sársenbaı Qotyrashevtyń Trıýmf arkasy aldyndaǵy máreli sáti – erik-jiger men qaısarlyqtyń aıqyn kórinisine aınaldy. Parıj tórinde qazaqstandyq jıhankezdi otandastary men dıplomattar qarsy alyp, onyń ulttyq mádenıetti álemge tanytýdaǵy eńbegin joǵary baǵalady.
Sársenbaı Qotyrashev 24 sáýirde Parıjge jetip, jaıaý saparynyń jańa kezeńin aıaqtady. 76 jastaǵy saıahatshy 3 naýryzda jolǵa shyǵyp, shamamen 3 000 shaqyrymdy júrip ótti. Onyń baǵyty Serbııa, Majarstan, Avstrııa, Germanııa arqyly ótip, Frantsııa astanasynda aıaqtaldy. Saıahat kezinde túrli qıyndyqtar men shekteýlerge qaramastan, ol óz maqsatyna jetti.
Buǵan deıin Sársenbaı Qotyrashev Qazaqstandy jaıaý aralap, keıin Kavkaz asyp Túrkııaǵa jetken. Odan soń Altaı men Mońǵolııa arqyly Qytaıǵa deıin barǵan. Áleýmettik jelide ol UlytauMan laqap atymen tanymal. Onyń ár sapary oqyrmanyn jigerlendirip, erekshe qyzyǵýshylyq týdyryp keledi.
Eýropadaǵy baǵyt – eń kúrdeli kezeńderdiń biri boldy. Qatań jol qozǵalysy talaptaryna baılanysty ol avtobandarmen tikeleı júre almaı, kóbine velosıped joldary men soqpaqsyz jerlerdi aınalyp ótýge májbúr boldy. Tipti júgin artqan arbasy da aýyrlyqqa shydamaı qalǵan sátter bolǵanymen, saıahatshy alǵan betinen qaıtpady.
– Men álemge qazaq halqynyń qaısar, rýhy bıik halyq ekenin kórsetkim keledi. Bizdiń ata-babalarymyz metaldy ıgergen, ǵylymmen aınalysqan, jylqyny qolǵa úıretken. Men osyny óz jolymmen dáleldeýdi maqsat ettim, - deıdi Sársenbaı Qotyrashev.
Parıjde jıhankez ıÝNESKO-nyń shtab-páterinde de qurmetke bólendi. Onda ony qazaq mádenıetiniń jarshysy retinde qabyldap, onyń mıssııasyn mádenı murany saqtaý men nasıhattaýdyń jarqyn úlgisi dep baǵalady.
Búginde aqsaqaldyń júrip ótken joly shamamen 18 myń shaqyrymǵa jetti. Onyń basty maqsaty – 75 jastan asqan saıahatshy retinde 40 myń shaqyrymnan astam jol júrip, Gınnestiń rekordtar kitabyna ený.
Elge oralǵan soń Sársenbaı Qotyrashev ustalyq ónerin jalǵastyryp, jańa saparlarǵa daıyndalmaq. 2027 jyly ol AQSh aýmaǵyn jaıaý kesip ótýdi josparlap otyr — Atlant muhıtynan Tynyq muhıtyna deıin.
Jıhankez qazaqstandyqtardy únemi qozǵalysta bolyp, ózin damytýǵa jáne úlken maqsattardan qoryqpaýǵa shaqyrady.
Eske sala keteıik, buǵan deıin qytaılyq saıahatshy qyz velosıpedpen Qazaqstandy aralaýǵa shyqqanyn jazǵan edik.
