76 jastaǵy horeograf: Balalardyń kózindegi ottan kúsh-qýat alamyn

ASTANA. KAZINFORM — Jaqynda ǵana balalarmen birge qosylyp bılep turǵan horeograf atanyń beınejazbasy áleýmettik jelini sharlap ketken edi. Dál osylaı jeli juldyzyna aınalǵan 76 jastaǵy qarııa «Búgin LIVE» stýdııasyna qonaq bolyp, óziniń tájirıbesimen bólisti. 

— Kishkentaı kezimde bımen múlde aınalyspaǵanmyn. Bizdiń aýyldaǵy mektepte ondaı úıirme bolǵan joq. Men Qostanaıda aldymen aýyl sharýashylyǵy salasyn oqydym. Alǵash ret sonda júrgen kezde bıge qatystym. Ol kezde tehnıkýmda uldar ǵana boldy. 1 jyldan keıin men ansambldiń quramyna qabyldandym. Sonymen ary qaraı bılep kettim. Odan keıin birden ınstıtýtqa tústim. Ony oqyp júrgende 4 jyl taǵy bıledim. Solaı elge 2 dıplomdy alyp, muǵalim bolyp kelgen kezde birden mektepten tegin qoǵamdyq úıirme ashyp, balalardy bıge úırettim, — deıdi kásibı horeograf.

Ersin Júsipov jelide kórermenniń qoshemetine bólengen vıdeo týraly ózi bı úıretetin balalarynan estigenin aıtady. Ol beınejazbany alǵash kórgen kezde ózin birtúrli sezingenin jetkizdi.

— Bul vıdeodaǵy balalar — osy Qoıandynyń balalary. Osynda konkýrs bolyp barǵanda men sahnanyń syrtynda turyp, balalarǵa bıdi kórsetip turǵanmyn. Sony bireý túsirip, salyp jiberipti. Ony 3–4 kúnge deıin bilgen joqpyn. Keıin balalarym kelip «Ata, mynany qarańyzshy. Siz juldyz boldyńyz» dedi. Men sol kezde tipti ne aıtarymdy da bilmeı qaldym. Syrttan túsirilgendikten kúlkili, kloýn sııaqty kórindi. Sosyn birden mektep dırektoryna habarlastym. «Nege meniń vıdeomdy salyp jibergensiń?» dep surasam, ol «Aǵaı, meniń kinám joq. Men olaı istegen joqpyn» dep jaýap berdi. Sóıtsem, ony múlde basqa adam salǵan eken. Ol jerde eldiń pikiri oń bolsa da, men ózimdi birtúrli, yńǵaısyz sezindim. 76 jasyńda ý-shý, azan-qazannyń ortasynda júrgen birtúrli sekildi kórindi, — deıdi qarııa.

Qart horeograf balalarǵa bı úıretýdiń qıyn ekenin jetkizdi. Tipti bir bıdi tolyq daıyndap shyǵýǵa 5 aı ýaqyt ketetin kórinedi.

— Kishkentaı balalardy bıge úıretýge kóp ýaqyt kerek. 1 bıdi qoıǵannan keıin ony 4–5 aı jattatasyń. Bulardyń bári 7–9 jas aralyǵyndaǵy balalar. Men negizinen halyq bılerin qoıamyn. Mektep dırektory maǵan «Osy „Kirpiler“ bıin qoıyńyzshy, men Qytaıdan kerek kıimderdi aldyraıyn» dep usynys jasady. Sol úshin men osy bıdi qoıǵan edim. Al mádenıet úıindegi ansamblde tek qazaqtyń ulttyq bıleri qoıylady, — deıdi ol.

Ersin Júsipovtyń qolynan túlep ushqan birqatar shákirt qazir kásibı bıshi. Olardyń arasynda óziniń de uly bar.

— Qazirgi tańda 30-dan asa shákirtim — kásibı bıshi. Kolledj, ınstıtýttarda sabaq beretin oqýshylarym da bar. Osylaı efırge shyqqaly beri bári de habarlasyp, meni quttyqtap jatyr. Meniń kishi balam da kishkentaı kezinde meniń bı úıirmeme qatysty. Keıin 9-synyp bitirgen soń Almatydaǵy Júrgenov atyndaǵy kolledjge ózim alyp baryp túsirdim. Ony bitirgen soń teatrda jumys istedi. Sosyn ýnıversıtetti de horeografııa salasy boıynsha bitirdi, — deıdi stýdııa qonaǵy.

Ol balalardyń kózindegi jalynnan qýat alatynyn aıtady. Oǵan qosa, mamandyǵyn shynaıy jaqsy kóretinin de jetkizdi.

— Men balalardyń kózinen ot kórgen kezde sodan ózime kúsh-qýat alamyn. Biz otyryp jumys istemeımiz. Kishkentaı balalarǵa bárin óziń kórsetýiń kerek. Eger kásibı bıshiler bolsa, olarǵa asa sharshamaısyń ǵoı. Biraq kishkentaı balalarmen birge júgirý kerek. Meniń shıraq, shymyr bolyp júrgenim bıdiń arqasy dep oılaımyn. Sol sebepti eń birinshi árbir adam óz mamandyǵyn súıýi kerek dep oılaımyn, — deıdi qart horeograf.

Aıta ketelik Dımash Qudaıbergen «Taý ishinde» ánine beınebaıan túsirgen edi.