76 myń oqyrmany bar telegram kanal UBT suraqtaryn satqan

NUR-SULTAN. QazAqparat – Bıylǵy UBT-da talapkerlerdiń ortasha balynyń tómen bolýyna testileýdiń meılinshe ashyq ótýi sebep bolýy múmkin. Ulttyq testileý ortalyǵynyń dırektory Rýslan Emelbaev ortalyq kommýnıkatsııalar qyzmetinde ótken brıfıngide osyndaı pikir bildirdi, dep habarlaıdy QazAqparat tilshisi.

«Bıyl UBT tapsyrǵandardyń 33 paıyzy ortasha bal jınaı almaǵan. Sebebi nede? Daıyndyq tómen be, álde suraqtary qıyn ba?» dep surady BAQ ókili.

Ulttyq testileý ortalyǵy dırektorynyń aıtýynsha, munyń birneshe sebebi bar.

«Shekti baldy jınaǵandardyń sany ótken jylmen salystyrǵanda 7% kóbeıip otyr. Árıne, shekti baldy óte almaýdyń birneshe sebepteri bolýy múmkin. Bıyl suraqtar jańartylǵan bilim mazmunyna qaraı qurastyryldy. Soǵan qaramastan, shekti mejeden ótknederdińúlesi 7 paıyz artyp otyr», - dedi ol.

Aıtýynsha, búginge deıin oqýshylar arasynda test suraqtaryn jelige salý tendetsııasy beleń alyp kelgen.

«Belgili ortalyqtar nemese belgili tulǵalar arnaıy telegram kanaldar arqyly test suraqtaryn jeli qoldanýshylarynyń nazaryna usynyp otyrǵan. Tipti 76 myń tirkelýshisi bar kanaldar osylaı jumys istegen. Testen shyqqan balalardyń suraqtaryn jınap, jarııalap otyrǵan. Bıyl biz suraqtardy kúnbe-kún qaıtalanbaıtyndaı etip istedik. Baldyń biraz tómen bolýyna osy áser etti. Jalpy bıyl jattaýǵa, faktologııaǵa beıimdelgen suraqtar, ásirese, Qazaqstan tarıhynan áldeqaıda azaıdy. Bıyl test suraqtaryn áleýmettik jelige salý faktileri bolǵan joq. Sebebi test suraqtaryn kommertsııaǵa aınaldyrǵan iri-iri telegram kanaldar jabyldy. Quzyretti organdarǵa ótinish bildirip, jolyn kestik. Sonda jattaýǵa beıimdelgen suraqtardyń azaıyp, suraqtardy áleýmettik jelige salý múmkindiginiń shektelýi ortasha baldyń tómen bolýyna áser etýi múmkin dep aıta alamyn», -dedi Rýslan Emelbaev.

Atalǵan brıfıngide Rýslan Emelbaev Face-ID júıesi inisiniń ornyna UBT tapsyrmaq bolǵan jigitti orta joldan qaıtarǵanyn aıtty.