757 mlrd teńge: Qazaqstandyqtardyń kóbi tisin Atyraýdaǵy stomatologııalarda «emdetken»

ASTANA. KAZINFORM - 2021 men 2025 jyl aralyǵynda Otbasy bankiniń enpf-otbasy.kz platformasy arqyly tek «Stomatologııalyq qyzmetter» baǵyty boıynsha 757 mlrd teńgege 795 424 tranzaktsııa jasalǵan.

Onyń ishinde 222,61 mlrd teńge TOP-20 stomatologııalyq klınıkaǵa túsken. Bul klınıkalardyń jartysy Atyraýda, qalǵandary Almaty men Astanada ornalasqan.

— Máselen, tek Atyraýdaǵy bir klınıkaǵa azamattar 22,9 mlrd teńge zeınetaqy jınaǵyn aýdarǵan. Jekelegen jaǵdaılarda klıentter ondaǵan mıllıon teńgeni tis emdeýge paıdalanyp otyrǵan. Klıentterdiń biri 11 ret BJZQ-daǵy qarajatty tis emdeýge paıdalaný úshin ótinish bergen. Onyń jalpy tis emdeýge alǵan somasy 32,6 mln teńge. Eger bir ımplant pen tis tájin ornatý quny 500 myń teńge dep eseptesek, 65 ımplant qoıýǵa jeterlik qarajat alynǵan. Taǵy bir klıent tisin emdeýge 24,7 mln teńge jumsaǵan. Bul qarajat birden stomatologııaǵa aýdarylǵan. Kelesi jaǵdaıda klıent tis emdeý úshin zeınetaqy jınaǵynyń artyǵyn paıdalanýǵa, 27 ret ótinish bergen. Nátıjesinde 13,1 mln teńge aýdarylǵan. Kóbine elimizdiń túpkir-túpkirinde turatyn azamattar tisin Atyraýdaǵy stomatologııalarda emdetýdi tańdaǵan, — delingen Otbasy bank taratqan málimdemede.

Tekserý kezinde jalǵan anyqtamalar men qujattar tapsyrylǵany da belgili boldy. Bul — zeınetaqy qarajatynyń maqsatsyz jumsalǵanyn aıǵaqtaıdy.

2026 jyldyń sáýirine deıin múddeli memlekettik organdarmen birlese otyryp, tis emdeýge zeınetaqy aqshasyn paıdalaný barysynda alaıaqtyq áreketterdiń aldyn alý úshin tıimdi júıe ázirlenetin bolady.

Buǵan deıin habarlaǵanymyzdaı Otbasy bank 2025 jyldyń 15 qyrkúıeginen bastap enpf-otbasy.kz platformasynda tis emdeýge arnalǵan zeınetaqy qarajatyn paıdalaný ótinishterin qabyldaýdy ýaqytsha toqtatty.