750 myńnan astam oqýshy respýblıkalyq fleshmob aıasynda býllıngke qarsy birikti
ALMATY. KAZINFORM – Elimizdiń barlyq óńirinde «Meniń mektebim býllıngke qarsy!» taqyrybynda respýblıkalyq fleshmob ótti. Oǵan 750 myńnan astam oqýshy qatysty. Bilim alýshylar biryńǵaı áýenge bı bılep, kámeletke tolmaǵandar arasyndaǵy býllıng máselesine nazar aýdartty.
Árbir mektep fleshmobty óz aýmaǵynda uıymdastyrdy, bı qımyldaryn oqýshylar ózderi shyǵardy. Aktsııaǵa tek oqýshylar ǵana emes, olardyń synyp jetekshileri de qatysty. Osylaısha, balalar býllıngke qarsy óz ustanymdaryn bildirip qana qoımaı, osy mańyzdy másele boıynsha qoǵamdyq pikir qalyptastyrýǵa úles qosty.
«Býllıng» – álemdegi ózekti máselelerdiń biri. Búgin mektep oqýshylary fleshmobqa belsendi qatysty, sol arqyly biz qoǵamnyń nazaryn balalardyń qaýipsizdigi máselesine aýdardyq dep oılaımyn. Oqýshylar aktsııaǵa qatysyp qana qoımaı, qoǵamnyń habardarlyǵyn arttyrýǵa naqty úles qosty», - deıdi «Órken» BÁAUǴPI birinshi vıtse-prezıdenti Elena Sakenova.
Fleshmob oqý jylynyń basynan beri búkil el boıynsha #bizdiń mektepbýllıngkeqarsy jáne #nashashkolaprotıvbýllınga heshtegterimen ótken chellendjdi qorytyndylady.
