750 myń adamnyń mártebesin anyqtaý jumysy júrgizilip jatyr – Tamara Dúısenova
ASTANA. KAZINFORM – 750 myń adamnyń mártebesin anyqtaý jumysy júrgizilip jatyr. Bul týraly Parlament palatalarynyń birlesken otyrysynda Premer-Mınıstrdiń orynbasary Tamara Dúısenova aıtty.
«Búgingi tańda 3 mln-nan astam azamat mindetti áleýmettik-medıtsınalyq saqtandyrylmaǵan. Osyǵan qatysty Úkimette shtab qurylǵanyn bilemiz. Ózińiz sol shtabty basqarasyz. Osy problemany sheshý máselesin qalaı qarastyryp jatyrsyzdar?», - dep suraǵan edi Májilis depýtaty Juldyz Súleımenova vıtse-premerden.
Úkimet basshysynyń orynbasary barlyq óńirde qurylǵan shtab 3 mln adamnyń mártebesin anyqtaıtyndyǵyn aıtty.
«Eger olar áleýmettik áljýaz azamattardyń qataryna qosylsa, onda olarǵa memleket tarapynan qajetti jarnalar tólenýi kerek. Al eger ózderi jumys isteıtin azamattar bolsa, onda olar jarnalaryn ózderi tóleýi tıis» degen máseleni qarastyryp jatyrmyz. Búgingi tańda 130 myń adamnyń mártebesi anyqtaldy. Qazir 750 myń adamnyń mártebesin anyqtaý jumysy júrgizilýde. Jyl sońynda osy máselege oraı ózderińizge qajetti aqparat beremiz», - dedi Tamara Dúısenova.
