75 jastaǵy kókshetaýlyq kir tasyn kóterýden Álem chempıony atandy
KÓKShETAÝ. QazAqparat - Kókshetaýlyq 75 jastaǵy ardager sportshy salmaǵy 16 keli kir tasyn 30 ret kóterip, Álem chempıony atandy, dep habarlaıdy QazAqparat tilshisi.
Aqmola oblysynyń dene shynyqtyrý jáne sport basqarmasynyń málimetine qaraǵanda, Ózbekstan Repýblıkasynyń Buhara qalasynda kir tasyn kóterýden jasóspirimder, erler men áıelder, ardagerler jáne múmkindigi shekteýli sportshylar arasynda Álem chempıonaty ótti.
Jarysqa álemniń 15 elinen ár jastaǵy 200-ge jýyq sportshy qatysty. Onyń ishinde Kókshetaýdan barǵan 75 jastaǵy ardager sportshy Borıs Nuǵymanov 75-79 jastaǵylar arasynda 80 keli salmaqta serpe kóterý ádisi boıynsha salmaǵy 16 keli kir tasyn 30 ret kóterip, Álem chempıony boldy.
«Borıstiń bul alǵashqy jeńisi emes, ol osyǵan deıin ardagerler arasynda ótken talaı halyqaralyq jarystarǵa qatysyp, júldeli oryndardy ıelengen. Bul joly da ol óziniń myqty ekenin taǵy bir márte dáleldedi», - deıdi Aqmola oblysynyń dene shynyqtyrý jáne sport basqarmasynyń baspasóz hatshysy Mahabbat Bolshına.
