74 jastaǵy qaraǵandylyq paýerlıfter Azııa, Okeanııa jáne Afrıka chempıonatynda jeńiske jetti

QARAǴANDY. QazAqparat – Qaraǵandy oblysy, Shet aýdanynda turatyn aqsaqal Dáribaı Ospanov paýerlıftıngten Azııa, Okeanııa jáne Afrıka chempıonatynda ardagerler arasynda eki márte jeńiske jetip, eki rekord ornatty. Atalmysh dodaǵa álemniń 80 elinen sportshylar qatysty, dep habarlaıdy QazAqparat tilshisi.

Dáribaı Ospanov 74 jasta. Ol 83 kg salmaq dárejesinde ardager M-4 (70 jastan asqan) kishi tobynda paýerlıftıngtiń eki túrinde baq synady.

Klassıkada ol 400 keli jınap, jalpy esepte I oryn aldy. Ekıpırovkamen óner kórsetýde 450 keli jınap, munda da I orynǵa ıe boldy. Osylaısha, D.Ospanov ardagerler arasynda Azııanyń absolıýtti chempıony atandy. Ol sondaı-aq Azııanyń eki rekordyn ornatty: ekıpırovkamen jatyp syǵymdap kóterýde – 150 keli jáne kópsaıysta – 450 keli.

«Men sportqa oıda joqta keldim. Aýyr jattyǵýlardyń arqasynda Azııa men álemniń birneshe dúrkin chempıony atandym, 63 jasymda halyqaralyq dárejedegi sport sheberi ataǵyn aldym. Álemdik rekordty 2021 jyly 72 jasymda Temirtaýda ótken Qazaqstan chempıonatynda qaıtaladym. Gonkongtaǵy chempıonatqa tórt aı daıyndaldym. Árıne, qıyn boldy, biraq jaqsy nátıje kórsettim. Segiz medal jeńip aldym, qazir on dúrkin Azııa chempıony, álemniń úsh dúrkin kúmis júldegerimin», - deıdi Dáribaı Ospanov.