74 myń astanalyqqa tumaýǵa qarsy ekpe salynady
ASTANA. QazAqparat - Qala bıýdjetinen bul maqsatta 65 mln teńgege jýyq qarjy bólindi, dedi elorda ákimdigi medıa ortalyǵyna Densaýlyq saqtaý basqarmasy basshysynyń orynbasary Tımýr Muratov.
«2017-2018 jyldarǵa arnalǵan epıdemııa maýsymyna 65 mln teńgege jýyq qarjy bólindi. Soǵan sáıkes, 74 myńǵa jýyq qala turǵynyn tumaýǵa qarsy tegin vaktsınalaýdy kózdep otyrmyz. Alynǵan vaktsına qalanyń emhanalaryna taratyla bastaldy», - dedi T.Muratov.
Onyń aıtýynsha, tegin ekpemen halyqtyń dekrettelgen toby, ıaǵnı jıi aýyratyn balalar, túrli toptaǵy múgedekter men dıspanserlik esepte turǵan naýqastar qamtylady.
«Qazir emhanalarda bul tizimder tolyqtyrylyp jatyr. Bekitilgen tizimge kiretin adamdar emhanalarǵa shaqyrylyp, tegin ekpe jasaıtyn bolady. Sondaı-aq, emhanadaǵy terapevt dárigerler belgili bir naýqasqa vaktsınatsııa jasaý kerek degen kórsetim qoısa, ol adamdarǵa da tegin jasaımyz», - dedi basqarma basshysynyń orynbasary.
Budan bólek, atalǵan topqa jatpaıtyn azamattar óz erikterimen saldyrǵysy kelse ekpeni aqyly túrde jasata alady.
«Vaktsınatsııa jasatqysy kelgen adam emhanaǵa kelip, aqyly túrde jasaýǵa múmkindigi bar. Jalpy, Astanada vaktsına tapshylyǵy bolmaıdy. Sebebi, aqyly qyzmet úshin bıýdjet esebinen emes, sol ekpeni alatyn azamattyń qaltasynan tólenedi. Shamamen bir ekpe 2200-3500 teńge aralyǵynda turady», - dedi medıa ortalyqtyń tilshisine bergen suhbatynda Tımýr Muratov.
Aıta keterligi, Astanada tumaýǵa qarsy ekpe 13 qalalyq emhana men 3 otbasylyq-dárigerlik ortalyqta júrgiziledi. Bıýdjet qarjysyna osy kúnge deıin Reseıde shyǵarylǵan «Grıppol» vaktsınasynyń 14 760 dozasy alyndy. Aldaǵy ýaqytta taǵy 58826 dozany alý josparlanyp otyr.
