74 myń teńgege deıin: Astanada jańa áleýmettik kómek engizildi

Jyl saıyn elordada áleýmettik osal sanattaǵy 186 myńǵa jýyq adam birjolǵy áleýmettik tólemdermen jáne tegin qyzmettermen qamtylady. Al 2024 jyldan bastap qalada jekelegen azamattarǵa jańa áleýmettik kómek engizildi. Kazinform bul týraly Astana ákimdiginiń resmı saıtyna silteme jasap habarlaıdy. 

2024 jyly qazannyń ekinshi jeksenbisinde atap ótiletin Múgedekter kúnine oraı áleýmettik kómek qoldanysqa engizildi. 1 toptaǵy múgedektigi bar adamdarǵa 20 AEK nemese 73 840 teńge, 2 toptaǵy múgedektigi bar adamdarǵa jáne barlyq toptaǵy on segiz jasqa deıingi múgedektigi bar balalarǵa – 10 AEK nemese 36 920 teńge, 3 topqa – 5 AEK nemese 18 640 teńge tólenedi. 

Budan basqa, ataýly kúnder men mereke kúnderinde azamattardyń mynadaı sanattaryna 2,5 AEK mólsherinde birjolǵy aqshalaı tólemder túrinde áleýmettik kómek kórsetiledi: 

– 4 aqpan (Dúnıejúzilik qaterli isikke qarsy kúres kúni) – áleýmettik mańyzy bar aýrýlary bar azamattar men qaterli isikteri bar balalar;

– 8 naýryz (Halyqaralyq áıelder kúni) - kópbalaly otbasylarǵa, kópbalaly analarǵa, onyń ishinde az qamtylǵan analarǵa;

– 21-23 naýryz (Naýryz meıramy) – ata-anasynyń qamqorlyǵynsyz qalǵan balalarǵa;

– 7 mamyr (Otan qorǵaýshylar kúni) – Qazaqstan Respýblıkasy aldyndaǵy erekshe eńbegi úshin zeınetaqy alýshylar qataryndaǵy zeınetkerlik jastaǵy adamdarǵa;

– 31 mamyr (Saıası qýǵyn-súrgin qurbandaryn eske alý kúni) - Saıası qýǵyn-súrgin qurbandaryna, saıası qýǵyn-súrginnen zardap shekken, múgedektigi bar nemese zeınetker bolyp tabylatyn adamdarǵa;

– 1 maýsym (Balalardy qorǵaý kúni) - jetim balalarǵa;

– 29 tamyz (Semeı ıadrolyq synaq polıgonynyń jabylý kúni) - Semeı ıadrolyq synaq polıgonyndaǵy ıadrolyq synaqtardyń saldarynan zardap shekken azamattarǵa, zeınetkerler men birjolǵy ótemaqy alýshylarǵa;

– 1 qazan (Qarttar kúni) – jasy boıynsha zeınetkerlerge jáne zeınetaqynyń eń tómengi mólsherin alýshylar qataryndaǵy zeınetkerlik jastaǵy adamdarǵa;

– 1 jeltoqsan (Dúnıejúzilik JITS-pen kúres kúni) - adamnyń ımmýn tapshylyǵy vırýsynan, onyń ishinde adamnyń ımmýn tapshylyǵy vırýsyn tasymaldaýshylardan zardap shegetin adamdar qatarynan áleýmettik mańyzy bar aýrýlary bar azamattarǵa.

Budan basqa, «Jappaı saıası qýǵyn-súrgin qurbandaryn ońaltý týraly» Qazaqstan Respýblıkasynyń Zańynda belgilengen tártippen 1986 jylǵy 17-18 jeltoqsandaǵy Qazaqstandaǵy oqıǵalarǵa qatysýshylar qataryndaǵy saıası qýǵyn-súrgin qurbandaryna 16 jeltoqsanda (Qazaqstan Respýblıkasynyń Táýelsizdik kúni) 60 AEK mólsherinde áleýmettik kómek kórsetiledi.

45 AEK mólsherinde áleýmettik kómek kórsetiledi:

– 15 aqpan (Keńes áskerleriniń shekteýli kontıngentin Aýǵanstannan shyǵarý kúni) - «Ardagerler týraly» Qazaqstan Respýblıkasy Zańynyń 5-babynyń 2, 3, 4, 5-tarmaqtarynda kórsetilgen basqa memleketterdiń aýmaǵyndaǵy jaýyngerlik is-qımyldarǵa qatysqan ardagerlerge; Aýǵanstanda áskerı qyzmet ótkerý kezinde jaralanýy, kontýzııa alýy, mertigýi nemese aýrýy saldarynan múgedektigi bekitilgen áskerılerge;

– 26 sáýir (Chernobyl atom elektr stantsııasyndaǵy apat qurbandaryn eske alý kúni) - jeńildikteri boıynsha Uly Otan soǵysynyń ardagerlerine teńestirilgen ardagerlerge, sondaı-aq Chernobyl atom elektr stantsııasyndaǵy apat saldaryn joıýǵa qatysqan adamdar qataryndaǵy basqa adamdarǵa.

9 mamyr Jeńis kúnine áleýmettik kómek azamattardyń kelesi sanattaryna beriledi:

– Ekinshi dúnıejúzilik soǵys ardagerlerine -1 (bir) mıllıon teńgeden kem emes;

– jeńildikteri boıynsha Ekinshi dúnıejúzilik soǵys ardagerlerine teńestirilgen ardagerlerge (osy Qaǵıdalardyń 16-tarmaǵynda kórsetilgen adamdardan basqa) -45 AEK;

– basqa memleketterdiń aýmaǵyndaǵy jaýyngerlik is-qımyldarǵa ardagerlerige (osy Qaǵıdalardyń 16-tarmaǵynda kórsetilgen adamdardan basqa) - 45 AEK;

– basqa adamdarǵa, eńbek ardagerlerine-15 AEK.

Áleýmettik kómek 25 qazanǵa (Respýblıka kúni) az qamtylǵan azamattarǵa 4,5 AEK (AÁK alýshylar qatarynan) mólsherinde kórsetiledi.