734 qaýipti ýchaske: temirjolda sý tasqynyna qarsy sharalar kúsheıtildi

ASTANA. KAZINFORM — Qazaqstan Respýblıkasy Kólik vıtse-mınıstri Jánibek Taıjanov sý tasqyny kezeńine temirjol kólig iınfraqurylymynyń daıyndyǵy týraly kezekti jedel keńesti ótkizdi. Bul týraly vedomstvonyń baspasóz qyzmeti málim etti.

Magıstraldyq jeli boıynsha 734 sý tasqyny qaýpi bar oryn anyqtaldy jáne 290 vagonnan turatyn 45 sý tasqynyna qarsy poıyz daıyndaý jumystary aıaqtalýǵa jaqyn.

Ońtústik, Batys jáne Shyǵys óńirler boıynsha sý tasqynyna qarsy poıyzdar 100%-ǵa daıyn. Soltústik óńir boıynsha poezdar 40%-ǵa daıyndaldy (jospar 15 birlik, fakt 6 birlik), obektilerdi tazartý jumystary josparly túrde jalǵasyp jatyr.

— Magıstraldyq jeliniń Almaty, Jambyl, Shymkent, Qyzylorda jáne Mańǵystaý bólimsheleri boıynsha baıandamalarǵa sáıkes sý tasqyny jaǵdaıy qalypty túrde ótýde, qar erýiniń kóp bóligi boıynsha jáne erigen sýlardy ótkizý shtattyq rejımde ótip jatyr, — delingen habarlamada.

Sý tasqyny kezeńinde sharalar qabyldaý úshin qajetti ınertti jáne qurylys materıaldary, onyń ishinde 2,5 myń tekshe metr býtty tastar, 7,4 myńnan astam temirbeton shpaldar, 10 ınventarlyq metall qurylǵylar, 41 ınventarlyq rels paketteri daıyndaldy. Sý ótkizgish qubyrlardy, shaǵyn kópirlerdegi qardy, muzdy jáne qoqystardy tazartý, taýly jáne sý aǵatyn aryqtardy ashý jumystary jalǵasady.

Mınıstrlikke sý tasqynyna qarsy poıyzdardy daıyndaýdy tolyq aıaqtaýdy, temirjolǵa jaqyn ornalasqan barlyq jeke sý qoımalarynyń jaı-kúıin tekserýdi, táýlik boıy kezekshilikti uıymdastyrýdy jáne sý tasqyny jaǵdaıy boıynsha apta saıyn tyńdaýlar ótkizýdi qamtamasyz etý tapsyryldy.

Buǵan deıin joldardaǵy sý shaıý qaýpi bar 229 ýchaske Kólik mınıstrliginiń baqylaýyna alynǵanyn jazǵan edik.