73 jastaǵy qarııany uryp-soǵyp, skotchpen baılaǵan urylar onyń úıinen mardymdy aqsha tappaǵan – ShQO
ShQO polıtsııa departamenti baspasóz qyzmetiniń málimetine súıensek, oqıǵa Shemonaıha qalasynda bolǵan.
Polıtsııaǵa habarlasqan zeınetker úıine tonaýshylar túskenin aıtyp, kómekke shaqyrdy.
«Belgili bolǵandaı, eki er adam 73 jastaǵy qarııanyń úıine basa-kóktep kirip, aıaǵyn skotchpen baılap, uryp-soǵyp, 70 000 teńge aqshasyn urlap ketken. Oqıǵa ornyna jedel jetken tártip saqshylary kúdiktilerdi ustady. Olar 41 jáne 62 jastaǵy jergilikti turǵyndar bolyp shyqty. Ekeýi de buryn osyǵan uqsas qylmys jasaǵany úshin sottalǵan», - delingen aqparatta.
Kinásin moıyndaǵan kúdiktiler qylmysty aldyn ala sóz baılasyp jasaǵanyn aıtqan.
Jábirlenýshi egde jasta bolǵandyqtan ózderine qarsy tura almaıtynyna senimdi bolǵan.
Tipti alǵan aqshasyn qanaǵat tutpaı, ishtegi baǵaly turmystyq tehnıkany alyp shyǵý úshin qaıta oralyp kele jatypty.
«Qazirgi ýaqytta ekeýi sot sanktsııasymen qamaýǵa alyndy. Atalǵan fakti boıynsha QR QK 191-baby 3-bóligine (tonaý) sáıkes sotqa deıingi tergeý amaldary bastaldy. Endi er adamdar besten-on jylǵa deıingi merzimge bas bostandyǵynan aıyrylýy múmkin», - delingen habarlamada.
