7200 gektar jer daýy: Pavlodar soty ýákiletti organnyń talabyn qanaǵattandyrmady
ASTANA. KAZINFORM – Pavlodar oblysynda aýyl sharýashylyǵyna arnalǵan jer telimin paıdalanýǵa qatysty daý sotta qaralyp, ýákiletti organnyń talaby qanaǵattandyrylmady.
Aımaqtyq ýákiletti organ aýyl sharýashylyǵy óndirisimen aınalysatyn jaýapkershiligi shekteýli seriktestikke 7200 gektar egistik, jaıylym jáne ózge de jerlerdi jalǵa bergen. Keıin organ bul jerdiń 6000 gektardan astam bóligi maqsatqa saı paıdalanylmaǵanyn alǵa tartyp, atalǵan aýmaqty alyp qoıý týraly talappen sotqa júgingen (Jer kodeksiniń 65-baby 1-tarmaǵynyń 1-tarmaqshasy).
Birinshi satydaǵy sot jerdiń maqsatqa saı paıdalanylmaǵany týraly jetkilikti dálel joq ekenin aıtyp, talapty qanaǵattandyrýdan bas tartqan. Sondaı-aq organ buzýshylyqtardy túzetý týraly uıǵarymnan keıin jerdi qaıta zerttemegeni anyqtalǵan.
Apellıatsııalyq satyda sot kelesideı mán-jaılardy anyqtady:
- JShS men fermerlik sharýashylyq arasynda birlesken qyzmet týraly shart jasalǵan, oǵan sáıkes daýly aýmaq 200 bas jylqy ustaýǵa paıdalanylǵan;
- 3000 gektardan astam jerge egin egilgenin rastaıtyn qujattar usynylǵan.
Pavlodar oblystyq soty birinshi satydaǵy sheshimdi qoldap, qosymsha mynalarǵa nazar aýdardy:
- berilgen uıǵarymnyń oryndalýy jónindegi aktiler joq;
- aýyl sharýashylyǵy jerleriniń eń tómengi ruqsat etilgen mólsheri týraly málimet usynylmaǵan;
- qaı bólikterdiń (egistik pe, jaıylym ba) alyp qoıýǵa jatatyny kórsetilmegen.
Sonymen qatar, Jer kodeksiniń 92-94 baptaryna sáıkes, jer teliminiń tek bir bóligin alyp qoıý zańmen kózdelmegen.
Osylaısha, birinshi satydaǵy sottyń sheshimi ózgerissiz qaldyryldy. Qaýly zańdy kúshine endi.
Aıta keteıik, ShQO-da jer qoınaýyn paıdalaný talaptaryn buzǵan kásiporyndarǵa aıyppul salyndy.