720 myń teńgege deıin «beriletin» járdemaqy - MÁSQ túsinik berdi
ASTANA. QazAqparat - Memlekettik áleýmettik saqtandyrý qory (MÁSQ) 1991-2018 jyldar aralyǵynda eńbek etken azamattarǵa 720 myń teńgege deıingi mólsherde járdemaqy tólenip jatqandyǵy týraly aqparattyń shyndyqqa janaspaıtynyn eskertedi, dep habarlaıdy QazAqparat tilshisi.
«MÁSQ 1991-2018 jyldar (kezeń ózgerýi múmkin) aralyǵynda jumys istetegen azamattarǵa 560, 600 nemese 720 myń teńge (soma ózgerýi múmkin) mólsherinde járdemaqy tólenip jatqandyǵy týraly WhatsApp jáne elektrondyq poshta arqyly taratylǵan aqparattyń shyndyqqa janaspaıtyndyǵy týraly eskertedi. Osyndaı aqparattyń paıda bolýyna baılanysty MÁSQ barlyq azamattardy beıresmı derekkózderden taratylǵan aqparattarǵa senbeý kerektigin eskerte otyryp, kópe-kórineý jalǵan aqparatty taratqan adamnyń zań boıynsha jaýapqa tartylatyndyǵyn eske salady», - delingen habarlamada.
Mindetti áleýmettik saqtandyrý júıesi Qazaqstanda 2005 jyldan bastap engizilgen. Ol eńbek etý qabiletinen, asyraýshysynan, jumysynan aıyrylýyna, júktilik jáne bosaný nemese jańa týǵan balany (balalardy) asyrap alýǵa, sondaı-aq 1 jasqa deıingi balanyń kútimine baılanysty tabysynan aıyrylǵan jaǵdaılarda jumys isteıtin azamattardy qoldaýdyń qosymsha deńgeıi bolyp tabylady.
«ıAǵnı, barlyq osy jaǵdaılarda júıege qatysýshy nemese onyń otbasy memleket tóleıtin áleýmettik járdemaqyǵa qosymsha MÁSQ-tan áleýmettik tólemder alady. MÁSQ barlyq azamattardy áleýmettik jeliler arqyly taratylatyn ártúrli habarlamalardy tekserip, tek resmı aqparat kózinen alynǵan aqparattarǵa sený kerektigin eskertedi», - dep atap ótti qordan.
MÁSQ qyzmeti týraly ózekti aqparattardyń barlyǵyn www. gfss.kz resmı saıtynan alýǵa bolady.
Eske sala ketsek, mundaı jalǵan aqparat buǵan deıin de taraǵan bolatyn. Ol kezde de MÁSQ halyqty beıresmı derekkózderge senbeýge shaqyrǵan edi.
