72 jolbarystyń ólimi: Taıland mysyq vırýsynyń órshýin toqtatýǵa shuǵyl kiristi
ASTANA. KAZINFORM — Taıland bıligi Chıangmaı provıntsııasynda jabaıy tabıǵat saıabaqtarynda ustalǵan keminde 72 jolbarystyń ólimine sebep bolǵan vırýstyq aýrýdyń órshýin toqtatýǵa tyrysyp jatyr, dep habarlady Іndependent.
Ólimniń kóp bóligi Tiger Kingdom Mae Taeng jáne Tiger Kingdom Mae Rim atty eki jeke haıýanattar baǵynda tirkelgen. Bul jerlerde týrıster iri mysyqtuqymdastarmen tyǵyz baılanysta bola alady.
Aımaqtyq qorǵalatyn aýmaqtar basqarmasynyń jarııalaǵan hronologııasyna sáıkes, 8-19 aqpan aralyǵynda Mae Taeng haıýanattar baǵynda – 51, al Mae Rim haıýanattar baǵynda 21 jolbarys qaza tapqan.
The Bangkok Post gazeti habarlaýynsha, mal sharýashylyǵy qyzmetkerleri júrgizgen aldyn ala taldaýlarǵa sáıkes, qaza tapqan 72 jolbarys mysyq parvovırýstyq ınfektsııasymen aýyrǵan.
Chıangmaı provıntsııasynyń mal sharýashylyǵy basqarmasynan kelgen veterınarlyq toptar júrgizgen máıitterdi tekserý zertteýi vırýs bar ekenin rastap, synamalardan sonymen qatar ıt oba vırýsy (CDV) jáne mıkoplazmalyq bakterııalar anyqtalǵanyn habarlady. Alaıda A tumaý vırýsy (qus tumaýyn týdyratyn) izderi tabylmaǵan.
Aıta keteıik, jýyrda Taılandtan oralǵan reseılik 2 azamattan maımyl sheshegi anyqtaldy.
Sondaı-aq osy elde adamdar men janýarlar arasyndaǵy qaqtyǵystar jıilegen óńirlerde jabaıy pilderge kontratseptıvtik vaktsına egip jatyr.