72 jastaǵy sportshy áje: Qarttyq sportqa tusaý emes
ÓSKEMEN. KAZINFORM – Óskemen qalasynda turatyn Roza Seıilqan jetpistiń ekeýine kelse de sportty janyna serik etken. Kún saıyn tańerteń 6-7 shaqyrym jaıaý júrip, aptasyna birneshe ret jeńil atletıka manejinde júgirip, túrli jattyǵýlar jasaıdy. Sonyń arqasynda ózin únemi sergek sezinip, kóńil-kúıi kóterińki júredi eken. Kazinform tilshisi sportshy apamen jolyǵyp, suhbattasyp qaıtty.
- Áńgimemizdi týyp-ósken jerińizden bastasaq...
- Shyǵys Qazaqstan oblysy Marqakól aýdanyna qarasty Alekseevka aýylynda dúnıege keldim. Kópbalaly otbasynda tárbıelendim. Toǵyz balanyń ishinde qyzdardyń úlkenimin. Áke-sheshemiz jumys babymen nápaqa taýyp júrgendikten, ini-sińilderime ózim bas-kóz boldym. Sol zamanǵa saı orta mektepti oryssha oqyp bitirdim. Ana tilime degen súıispenshilikten 2008 jyldan beri qazaq tilin oqyp, tilimdi jattyqtyryp kelemin.
- Ómir jolyńyzda qaı salada jumys istedińiz?
Mektepte qatarymnyń aldy boldym. Qoǵamdyq is-sharalardan qalyspaı, belsendilik tanyttym. Alaıda ary qaraı bilim qýyp, joǵary bilim ala almadym. Otbasyma qaraılastym. Dese de mektep bitirgen soń araǵa eki-úsh jyl salyp oqýǵa túsip, arnaıy orta bilim alyp shyqtym. Aýrýhananyń tazalyǵy men rettiligine jaýap berip sanıtar qyzmetin atqardym.
- Sportqa bala kúnnen jaqyn boldyńyz ba?
- Dene shynyqtyrý pánin bala kúnnen jaqsy kórdim. Biraq sportqa asa den qoıyp, turaqty aınalysa bastaǵanym - turmysqa shyqqannan keıingi ýaqyt. Joldasym sportshy edi, soǵan eliktep men de sportty serik ettim. Qazir salaýatty ómir saltyn ustanyp, denemdi sergek ustaıtynyma qýanamyn. Ózim sııaqty egde jastaǵy adamdardy sportqa baýlyp júremin. Qartaıǵanda tórt qabyrǵaǵa qamalyp, tórtburysh jáshikten kóz almaı otyrǵansha, bir sát taza aýaǵa shyǵyp, shynyǵyp qaıtqan qandaı jaqsy!
- Jasyńyz 72-ge kelse de áli sportty tastamaı kele jatqanyńyzǵa tańyrqap otyrmyn.
- Ómirimniń ár kúnin sanaly qarsy alǵym keledi. Sportpen aınalysqannan soń kúsh-qýatym kóbeıip, ózimdi sergek sezemin. Shabyttanyp, kúndelikti sharýalardy bitirýge qulshynysym artady. Kún saıyn tańerteńgi taza aýamen keń tynystap, tamasha kúıge bólenemin.
- Sonda kún saıyn tańerteń qansha shaqyrym jaıaý júresiz? Al jeńil atletıka manejine aptasyna neshe ret kelesiz?
- Kún uıasynan shyqpaı turyp oıanýǵa tyrysamyn. Ádette saǵat tańǵy 3 jarymda turamyn. Jasylǵa malynǵan «Óskemen alleıasyn» úsh ret aınalyp shyǵamyn. Alleıa boıymen kele jatsańyz alystan munartqan bıik taýlardyń ásem kórinisine kýá bolasyz. Shynyǵý alańynda jattyǵý jasap, tańǵy samal jelmen tynystap, bir sergip qalamyn. Kúsh-qýatym artyp, mıyp da tynyǵady. Kúnine tańerteń 6-7 shaqyrymdaı jaıaý júremin. Al jeńil atletıka manejine aptasyna úsh ret kelemin. Jattyqtyrýshylar jasymyzǵa saı 500 metr júrgizedi, 60 metr júgirtedi. Qalǵan jattyǵýlardy shamamyzǵa qaraı qalaýymyzsha oryndaımyz,
- Sporttan bólek taǵy qandaı hobbılerińiz bar?
- Adamdarmen tildesip, aralasqandy jaqsy kóremin. Qandaı da bir is-sharalarǵa shaqyrsa, qalmaı barýǵa tyrysamyn. Seısenbi, beısenbi kúnderi Dostyq úıindegi «Aq bosaǵa» ansamblinde án aıtyp, óner kórsetemin. Jeksenbi kúni ardagerlerge arnalǵan bı keshi bolyp turady. Ótken aptada bizdiń ansamblimizdi «Ertis» kontsert zalynda ótetin retro bı keshine shaqyrǵan. Eki tilde óleń de oqımyn. Aqıyq aqyndardyń ómirsheń óleńderin oqý – kóńilime qýanysh syılaıdy.
- Otbasyńyz sportpen aınalysqanyńyzǵa qalaı qaraıdy?
- Balalarym, joldasym qoldaıdy. Qartaıdym dep úıde otyrmaı, ózimniń súıikti isimdi tapqanyma qýanady. Alǵashynda týysqandarym kúlip, durys qabyldamap edi. Sonda da eshkimniń sózine mán bermeı, janym qalaǵan dúnıeni jasaı berdim. Osy joly jeńil atletıka manejinde sport jattyǵýlarynan qarttar arasynda ótken jarysqa qatysyp, úshinshi oryndy ıelendim.
- Sportpen shuǵyldanýǵa jalqaýlanatyn jastarǵa ne aıtar edińiz?
- Sportpen aınalysýdy qaı jasta bolsyn bastaýǵa kesh emes. Jaspyn, áli erte demeı dene shynyqtyrýdy qolǵa alyp, jalqaýlyqty jeńý kerek. Eń bastysy, az bolsa da kún saıyn úzbeı istegen durys. Jastar alǵa maqsat qoıyp, salaýatty ómir saltyn ustansa eken deımin. Qarttyq sportqa tusaý emes. Sol úshin egde jastaǵylar da úıde jata bermeı, sportpen shuǵyldanyńyzdar!
