72 jastaǵy qyzylordalyq kúnine 10 shaqyrym jaıaý júredi
QYZYLORDA. KAZINFORM – 72 jastaǵy qyzylordalyq Aıtan Qydyrbaeva bes jyldan beri jaıaý júrýdi ádetke aınaldyrǵan.
Ol Syrdarııa aýdanynyń Sáken Seıfýllın aýylynda turady. Qyryq jyldan astam ýaqyt aýyl balalaryna bilim men tárbıe berip, beride zeınetke shyqty. Al bes jyl buryn jaıaý júrýdi bastady.
- Alǵashqy kezde jurttan uıalyp, joldasym ekeýmiz aýyldyń syrt jaǵyna qaraı júretinbiz. Keıin «nesine uıalamyn?» dep baǵytymdy aýyldyń úlken kóshesinen kórshi aýylǵa qaraı aýystyrdym. Odan aýdan ortalyǵyna deıin sozdym, - dedi keıipkerimiz.
Aıtan Qydyrbaeva tańerteń uıqydan oıana salysymen júgirmeıdi. Aldymen sý iship alyp, sosyn jattyǵý jasaıdy. Muny júgirý aldyndaǵy daıyndyq deýge bolady. Bilim salasynyń ardageri júrgen jerinde jaqsy ádettiń paıdasy jaıynda jıi aıtady. Ony ózi de óz basynan biledi.
- Densaýlyqqa kóp paıdasy bar ekenine kózim jetti. Mysaly, meni qan qysymy, sozylmaly demikpe, ót joly aýrýy mazalaıtyn. Qazir, shúkir, kóp tirlik jasap qoıǵanda bolmasa aýyrmaımyn, - dedi Aıtan Qydyrbaeva.
Oǵan erip jaıaý jaıaý júretinder qatary birtindep kóbeıip keledi. Kúndelikti serigine aınalǵan Aıman Qaldyǵaraeva ekeýi táýligine 8-10 shaqyrym shamasyndaǵy joldy artta qaldyrady.
- Qazir joldasym da jaıaý júrýge qaıtadan mashyqtanyp júr. Ol kúnine 4-5 myń qadam jasaıdy. Nemerem de atasynan qalmaı izinde júredi, - dedi keıipkerimiz.
Aıta keteıik, júıeli túrde jaıaý júrý, júgirý qan qysymyn qalypqa keltirip, qan tamyrlarynyń tonýsyn arttyrady.