72 myń AQSh dollarynan astam qarjyny shetel asyrmaq bolǵan QR azamaty quryqtaldy
ASTANA. 6 qyrkúıek. QazAqparat - 5 qyrkúıekte Almaty qalasynyń kedenshileri «Valıýta» jedel-profılaktıkalyq sharalaryn júrgizý barysynda ekonomıkalyq kontrabandalyq sıpattaǵy qylmystyq istiń jolyn kesti.
Bul týraly Almaty qalasy boıynsha kedendik baqylaý departamentiniń baspasóz qyzmeti habarlady.
Kedendik baqylaý departamentiniń qyzmetkerleri halyqaralyq Almaty áýejaıynda «Almaty - Úrimshi» baǵytyndaǵy áýereısin tirkeýden ótkizý kezinde, Qytaı eline zańsyz 72 300 AQSh dollaryn quraıtyn shetel valıýtasyn jasyryn alyp ótpek bolǵan 1958 jylǵy Qazaqstan Respýblıkasynyń azamatyn quryqtady.
Búginde atalǵan dáıekke (ekonomıkalyq kontrabanda) qatysty Almaty qalasy boıynsha Kedendik baqylaý departamenti QR QK 209 babyna sáıkes aldyn ala tergeýge deıingi tekserý amaldaryn júrgizýde.
