7173 úmitkerden ákimdikke kandıdattar retinde 7018 adam tirkeldi - OSK

ASTANA. 25 shilde. QazAqparat - 24 shildede Qazaqstan Respýblıkasynyń aýdandyq mańyzy bar qalalary, aýyldyq okýrýgteri, aýyldyq okrýgtiń quramyna kirmeıtin kentteri men aýyldary ákimdigine kandıdattardy usyný aıaqtaldy. Aýdandyq jáne qalalyq saılaý komıssııalarynyń usynǵan derekterine sáıkes, respýblıka boıynsha usynylǵan 7173 úmitkerden ákimdikke kandıdattar retinde 7018 adam tirkeldi. Bul týraly búgin Ortalyq saılaý komıssııasynda ótken brıfıngte málim boldy.

OSK baspasóz hatshysy Venera Jeksembekovanyń aıtýynsha, saılaý naýqanyna qatysqan kandıdattardyń sapalyq quramynda túbegeıli ózgerister bolǵan joq. «Usyný aıaqtalǵannan keıin 46 kandıdat jeke ótinishteri boıynsha óz kandıdatýralaryn alyp tastady. Al aýmaqtyq saılaý komıssııalarynyń sheshimi boıynsha 55 kandıdatty tirkeýden bas tartyldy. Tirkeýden bas tartýdyń negizgi sebepteri atalǵan kandıdattardyń 2013 jylǵy 24 sáýirdegi QR Prezıdentiniń Jarlyǵymen bekitilgen Ákimderdi saılaý qaǵıdalarynyń talaptaryna sáıkes kelmeýi bolyp otyr. Sonymen qatar, tirkeýden keıin 51 kandıdat shyǵyp qaldy. Olardyń 15-i kandıdatýralaryn óz ótinishteri boıynsha alyp tastasa, 36 kandıdat aýmaqtyq saılaý komıssııalarynyń sheshimimen alyndy. Óıtkeni, atalmysh kandıdattardyń kiris jáne múlik týraly usynǵan málimetteri salyq organdarynyń anyqtaǵan málimetterimen sáıkes kelmedi», - deıdi V. Jeksembekov.