71 kólik apaty: Elorda polıtsııasy júrgizýshilerdi saq bolýǵa shaqyrdy

NUR-SULTAN. QazAqparat – Nur-Sultan qalasynyń polıtsııasy júrgizýshilerdi aýa raıynyń kúrt ózgerýine baılanysty asa saq bolýǵa shaqyrdy, dep habarlaıdy QazAqparat qalalyq Polıtsııa departamentiniń baspasóz qyzmetine silteme jasap.

«Qalada jańbyr jaýyp, arty qarǵa ulasyp jatyr. Osyǵan baılanysty júrgizýshilerdi jolda asa saq bolyp, jyldamdyq rejımin saqtaý kerektigin jáne jyldam júrip kele jatyp kúrt toqtaýǵa bolmaıtynyn eske salamyz. Jolda polıtsııa qyzmetkerleriniń talaptaryna muqııat bolyńyzdar!. Búgingideı aýa raıynda alys jolǵa shyqpaýǵa, múmkindiginshe qoǵamdyq kólikti paıdalana turýǵa keńes beremiz»,-delingen polıtsııanyń habarlamasynda.

Polıtsııa taratqan málimetterge qaraǵanda, búgin tań atqaly beri qala joldarynda 71 kólik apaty bolǵan.

«Saqtyq sharalaryn júrgizýshiler ǵana emes, jaıaý júrginshilerdiń de qatań saqtaǵany durys. Joldan tek arnaıy belgileri bar jerden ǵana ótýge tyrysyńyzdar, sondaı-aq joldan óter kezde qulaqqapty sheship, telefonmen áńgimeni de toqtatqan jón»,-dedi Nur-Sultan qalalyq Polıtsııa departamentine qarasty Ákimshilik polıtsııa basqarmasynyń bastyǵy Eljan Shúpekov.