7000-nan astam qundy qujat ǵylymı aınalymǵa endi
ASTANA.KAZINFORM — Astana qalasynda «Arhıv-2025: arhıvtegi amanat» atty respýblıkalyq ǵylymı-tájirıbelik konferentsııa ótti. Oǵan QR Parlamenti Májilisiniń depýtattary, QR Mádenıet jáne aqparat mınıstrliginiń ókilderi, respýblıkalyq jáne oblystyq arhıvterdiń basshylary, arhıv salasynyń mamandary, tarıhshy-ǵalymdar qatysty. Bul týraly Mádenıet jáne aqparat mınıstrligi málim etti.
Jıyn barysynda Arhıv, qujattama jáne kitap isi komıtetiniń tóraǵasy Rýstam Álı QR Mádenıet jáne aqparat mınıstri Aıda Balaevanyń quttyqtaý hatyn oqydy.
— Sizder elimizdiń tarıhı-mádenı murasy men baǵa jetpes jádigerlerin saqtaý, olardy ǵylymı aınalymǵa engizý, keleshek urpaqqa jetkizý jolynda qajyrly qyzmet etip kelesizder. Eldiń zııatkerlik menshigi men mádenı ıgiliginiń tutastyǵyn saqtap, arhıv isin jetildirip, aýqymdy jobalardy júzege asyrǵandaryńyz úshin alǵysym sheksiz, — delingen quttyqtaý hatta.
Konferentsııanyń maqsaty — 2020-2025 jyldarǵa arnalǵan «Arhıv-2025» jobasyn iske asyrý boıynsha keshendi is-sharalar josparyn qorytyndylaý.
Konferentsııa barysynda qatysýshylar 2020–2025 jyldarǵa arnalǵan «Arhıv–2025» jobasyn iske asyrý jónindegi keshendi is-sharalar josparynyń nátıjesin talqylap, kórme materıaldary mee arhıv mekemeleriniń jańǵyrtylǵan materıaldyq-tehnıkalyq bazasymen tanysty.
— Kóne qujattar qatarynda 918 jyly Temir hannyń Saıbek hanǵa elshi jiberip, Buryndyqpen mámilege kelýi týraly derekter jáne Shyǵys Túrkistan halqynyń táýelsizdigimen bostandyǵy úshin kúresken Ospan batyr týraly Nurǵojaı batyrdyń estelikteri bar. Budan bólek mádenıet, ǵylym, túrli salalar men qazaqtyń turmys-tirshiligi men salt-dástúrine qatysty qujattar da saqtalǵan. Qazaqtyń kúıshi qyzy Dına Nurpeıisova túsken qysqa beınesıýjet, bıshi Shara Jıenqulova jaıly derekter de arhıv qoryna endi, — delingen habarlamada.
Aıta keteıik, 2020 jyldan bastaý alǵan joba aıasynda respýblıkalyq arhıvterdiń ǵylymı-ekspedıtsııalary Germanııa, Polsha, Chehııa, Túrkııa, Frantsııa, Majarstan, Úndistan, Iran, Egıpet, Qyrǵyzstan, Reseı Federatsııasy, Ázerbaıjan, Belarýs, Katar syndy 14 elde anyqtaý jumystaryn júrgizdi.
Ǵylymı zertteý nátıjesinde 913-1990 jyldar aralyǵyndaǵy Qazaqstan tarıhyna qatysty 7000-nan asa qundy qujat jınaqtalyp, ǵylymı aınalymǵa engizildi.